Pigparalastaran palan daa ni DILG Secretary Jonvic Remulla si Bise Obet Fernandez y magcapirang miembros kan junta provincial sa ginibong pribadong miting sa sarong cuarto sa Rakdell hotel.
Segun sa mga nacaisi, dae daa mabilang na muda asin samay an ikinarigos sa mga nanunungdan kan Isla Maogma dahil sa pagpasar caini nin resolusyon na nagdeclarar qui Gob Pata bilang persona non grata.
Kung ano itong mga dae masaho na mga pananaramon, dae ta na pag-otrohon tanganing dae na madagdagan an muromuto kan mga kinarigos na daeng sabon, he! he! he!
Dati nang sinabi kan amo nin mga local na gobyerno na kan panahon niya bilang PBM sa Cavite, pigrespeto ninda an pagkatawo y posisyon kan nangganang gobernador minsan dinaog caini an saiyang ama y lamang an saendang grupo sa SP sa numerong 13-0.
Base sa saiyang lengguahe, daculang insulto sa posisyon an ginibo kan magcapirang miembros kan SP, cabale na si bise gob, na soboot nagnegar na nacaisi siya kan plano.
Sabi pa ni Remulla na plano daang magcandidato bilang presidente sa 2028, nasa saiya daa an desisyon kung sususpendihon an bise y pag-iriba o caya harion entero sa puesto.
Guiromdomon tabi na an tugang caini na si Jesus Crispin Remulla, kun saen parehong nagkasohan an mag-ibong na lado sa Isla Maogma.
*****
Sabi kan mga nacadangog, dae man daa naimbitaran an gabos na bocal duman sa inagurasyon kan edificio nin mga bumbero pati na sa sekretong miting sa Rakdell.
Dae man ngani daa duman an duwang PBM na dating kaalyado ni Gob Pata na nagbaliktad matapos na magsabing nabudol sinda kan panahon nin campanya.
Inano daw an aso sa dungo asin taringa ni Remulla kung presente pa an duwang ini. Kalayo na siguro an maluwas, he! he! he!
*****
Base sa mga nangyayari, an icaduwang congresista kan Isla Maogma, si TGP Rep. Bong Teves, an adviser kan bag-ong mayoriya sa SP.
Soboot an plano magpasar nin duwang resolusyon na babawion an declarasyon qui gobernadora bilang persona non grata, pati na an amyenda sa quarry ordinance.
Saro pa, sasalidahan daa an chairman kan duwang comitiba, an infrastructure y appropriation, na itao sa ibang mas maboot na mga bocal, he! he! he!
Maisihan na sana kan publico kung nangyari an mga bagay na ini.
*****
Dae pa naorian an mga tricycle driver na dae nacarecibe kan cinco mil na ayuda kan govierno nacional.
Sagcod ngonian grabe pa an muromuto kan mga ini, lalo na sa mga baco man na mga qualificado na nacabali sa listahan na isinumitir kan oficina ni Cong Yoloyo sa tabang ni Consejal Alip Abundo.
Segun qui Bise Mayor Lemuel Surtida, dae pa natapos an pagrebisa kan listahan ni Cong Yoloyo na ginamit sa pagtaltag y an listahan na hari mismo sa consejo municipal.
An duwang listahan isusumitir sa factfinding body na pangengenotan ni Consejal Fred Gianan Jr., an solamenteng abogado sa sanggunian.
Duman na maisihan kung sisay an mga empleyado nin municipio na nakumbinsing magpalista, mga pangaran na doroble o triple an pacalista, mga recipienteng bako man taga-Virac, mga gadan nang driver, y mga tawong bako man tricycle driver.
Ano man an maging resulta kan imbestigasyon na ini, cierto na daculang kabawasan sa voto ni Cong Yoloyo y Consejal Alip sa masunod na eleksyon.
*****
An magayon na dapat kahapotan ngonian kan mga consumidor nin Baras Water District iyo an mga ini: Gurano an inisyal na utang kan BWD sa LWUA? Ngata ta dae nabayadan? Pira an interes kan LWUA y sa P25 million na utang pira an parte kan interes y penalidad? Sisay an mga cincuenta y dos katawong nag-atender sa ginibong public hearing? Igua daw saenda nin nagreclamo sa kariog na paglangkaw kan minimum charge?