Inaapodan an mga barangay na kapareho ning Iglesia sa pagvoto.
Matao daa si atorni puting buhok ning cincuenta mil pesos sa arin man na barangay na makapa-zero sa saiyang mga kalaban sa pagka-congresista.
Ini daa para sana sa mga barangay sa luwas ning Bato, ta duman daa sa kahadean ni alcalde Juan, an saiyang campanya siya an dapat ma-zero, iguang premyong cinco mil an barangay, he! he! he!
Sobrado na daa an saiyang voto sa Mayo nueve, caya lang daa an saiyang mga kalaban gusto siya paatrason.
An saiyang hapot, kung sa pagheling daa kan saiyang mga kalaban, lalo na an mga naderotang politico, siya kapurit sa survey, ngata ta siya paatrason?
Sa ngonian daa, sabi kan mga balagbalagon na nakaribot na sa enterong onceng municipio, si atorni puting buhok an may pinakadakul na tarpaulin na naikabit na sa mga kudal, harong asin iba pa.
Iyan an ganador, he! he! he!
*****
Nag-arabot na an magcapirang politicong tahodan para sa maabot na campanya.
Kan nacaaguing semana, nag-aparecer na si dating Cong Dayunyor, na iyo an naging sulsoltant ni Manoy Hector kan 2019 election.
Matapos ini mag-withdraw sa laban bilang bise presidente, nagpresentar daa an dating congresista sa grupo ni BBM para maging regional coordinator kan saiyang campanya sa Bicolandia.
Caya, igua na naman nin mapagkitaan an solamenteng natada na politicong Verceles sa Isla Maogma.
Kung saen naka-estar si Dayunyor, hanapa niyo na sana tabi ta an dating harong ninda sa SIV ginibo nang warehouse kan nakabakal na negociante, he! he! he!
An hapot, sisay daw an saiyang mga tanwo sa provincia? Mantang siya daa an pigasabing sulsultant man ni bise gob Shy, an candidato sa pagka-gobernador nasa Aksyon Demokratiko ni alcalde Isko alagad secreto daang supporter ni VP Leni.
An talagang dapat magsuporta qui BBM iyo si Cong Hec, ta siya aduman sa Lakas na pinamamayuhan ni dating presidente GMA. Alagad, dae man makahayag nin campanya an congresista ta tibaad dae na magvoto sa saiya an otsenta porciento kan mga votante na an gusto si VP Leni.
Caya ngani grabe an hingoha kan politicong naderota kan 2019 na makasingit sa mga actividad kan Leni Is Our President Movement, ta tibaad makasab-it man nin voto, he! he! he!
*****
Nag-abot man daa kan nacaaguing semana si dating congresista Cotipyo, pero bakong politica an tuyo.
Kaibahan daa caini an mga miembros kan familia Santiago para sa kapiyestahan ni San Jose.
Dae man daang ibang piga-endorso si Jas kundi an saiyang amigo na si Gibo Teodoro para sa pagka-senador.
Alagad dae man maiwasan na bisitahon kan saiyang mga dating tawo y kaalyado na an bitbit puro mga chismis sa politica.
Namasyar man daa an sarong dating congressman para mangumusta alagad dae man daa naghagad na itaason an saiyang kamot, he! he! he!
Maguiromdoman na ultimong nagcandidato si Cotipyo kan 2019, kung saen nakisawsaw man ini sa ralabanan sa dati niyang puesto y nakakua pa man nin halos sais mil na voto.
*****
Igua nang nagluwas na survey sa mga gadalagan sa puesto sa provincia.
Siring sa pagheling kan cadaclan, lamang na lamang an magtugang na Boboy y Bos Te sa mga hinapot na mga estudyante y empleyado kan CatSU.
Lamang man an dating congresista na iyo an nagproponir kan ley tanganing maging unibersidad an dating CSC. Pangduwa si Cong Hec y pangtolo si dating alcalde Yoloyo. Kapurit si atorni puting buhok.
Bago mag-uroktoy sa kaogmahan an mga candidatong lamang pati na an saendang parasunod, guiromdomon tabi na survey man sana ini.
No money involved, sabi kan mga tahodan, caya ngani kadinakul an nag-abstain o dae nagvoto sa survey.
Natural na an sa mga constituentes kan Isla Maogma, an cadaclan baging jukebox, dae matugtog kung dai huhulugan nin sinsilyo, he! he! he!
Alagad, siempre an mga votante bako man na jukebox na haring Raon, igua man an nin mga isip. Caya sa laog kan cuarenta y cinco dias na campanya, mareparo man ninda kung an candidato iguang capacidad na manaltag kan pinagalan o hinabonan na perac.
Kung sa heling ninda, dae talaga manaltag an dating congresista, daeng halaga an mga naenot na survey.
Igua na nganing osipon na tibaad nakihoron-horon na ini sa naderotang alcalde. An hapot, sisay daw an ma-withdraw sa karera y sisay man an ma-withdraw sa ATM?
Siempre maogma an hari sa ATM, he! he! he!