masdi ngani ang bâhaw
baging princesang nakadulag
sa torreng-bato nyang kulungan
kaya dahil sa sainyang katalingkasan
ang gabos na kapaributan
ga sarayaw sa grabing kaugmahan
atâ bayâ dang’ga ang harâhâ
kang mga ga sarapo sainya
biyong ga uruktoy, kayâ
maski saen na sana nakatarapsik
dang’ga man ang palakpakan
kang manglaen-laen na dahon
magdalacura, magsaladatuy
magbilogon, magharaban’on
magbierde, maggiyaw
maski su gurang nang manaro
na nakatugpô sa arintitî ning kahoy
baging iyo na lugod ang maestro
kang orkestra ning mga gamgam
na minatanyog sa kasarugan
salubaku, engrandeng celebrasyon
tunay na kafiestahan ning natura
na dai dapat pakialaman
ning sisay man