ISIP-ISIPON TA | qui Tang Tacio:

Magpa-survey man an mga kapurit

Iguang reclamo manongod sa mga trak nin mga contratistang politico na nakaolang na sa mga
pampublicong tinampo.
Segun sa reclamador, na iguang koneksyon sa tubig, saro daa caini adyan sa San Isidro Village y an
tinampo na kataning duman nakahilera an mga trak na gamit sa mga contrata.
Puede daa cotana ito kung iguang pigabayadan na long-term parking fee sa barangay, alagad awat na
daang nakatambay sa tinampo an mga vehiculo ni Pay.
Diyan man daa sa iguang CNHS, duman sa binuksan na kudal kan dibisyon ofis, mga apat o limang trak
man nin contratistang politico an pirang bulan nang gahalat nin piyesa para mahingayad an mga ini.
Sagcod daa ngonian, an patrabaho sa lugar na ini dae pa natatapos por sobre ta nakaolang man an mga
vehiculong palyado arog kan cagsadiri, he! he! he!
Dae man sigurong narerecibeng reclamo an capitolyo sa camogtacan na ini kan provincial road.
Kung sisay an mga ini, hapoton na sana tabi an reclamador na iguang koneksyon sa tubig.
An saro daa sa mga politicong contratista, guminurang na sa serbisyo publico (masque kan buhay pa si
Nestor) y an saro dati nang natigbak alagad nabuhay liwat, he! he! he!
Segun sa reclamador, an saro dindi awat na cotana pinaretiro kan mga votante alagad pirming natawan
nin extension ta alisto man magbayad, he! he! he!

An icaduwa gahengoha man na maghalawig pang diit an buhay politica, lalo na ta nakakua nin
deligencia, he! he! he!
*****
Sagcod daa kan Domingo, fecha a-nueve nin Enero, saro sana sa apat na candidato para congressman
an nasa Isla Maogma.
An tolo puro pa nasa Maynilang kayganda, extended an pagdulag sa mga parasolocit nin regalo, painom,
pabertdey, paanibersaryo, padebut, pabunyag, pakasal, pambakal nin bolong sa calentura asin iba pang
nakaomay nin kulog nin bolsa, he! he! he!
Mayad pa daa si atorni Puting Buhok ta namarapara sa banwaan nin Bato y Virac, minsan ong sakit
daang hagadan lalo na kung an mahagad propesyunal na parasolocit, he! he! he!
Segun sa saro kan saiyang nabilang sa kamot na mga lider, saboton daa si atorni ta sa apat na
aspirante, siya sana an daeng dukit.
Dapat palan papuntahon ngona sa carwash ni consejal Toto Mendoza an mga ini tanganing siguradong
malinig pagpoon kan campanya, he! he! he!
*****
Bahala an mga votante, lalo na an mga mahilig sa social media, kung matubod sa nagluwas na survey
kuno sa banwaan nin Virac.
Dai man nagpamidbid kung sisay an nagsurvey o caya kung mga katutubod man na mga tawo an
kaguibo caini.
An suspetsa kan cadaclan na mga chismoso sa politica, gibo-gibo sana nin sarong dating politico para
mapahiling sa Isla Maogma na siya pigahanap pa kan mga constituentes.
Kung hihingibiton mo an mga numero, maluwas na veinte mil katawo an hinapot sa survey sa manlaen-
laen na puesto.
Alagad sa congresista, gobernador y alcalde nin Virac, tunay man na veinte mil an nagsimbag. Alagad
pag-abot sa bise gobernador y bise mayor, an suma total kan mga nagresponde dae na ngani naka-
quince mil. Nangaen daw an iba?
*****
Guiromdomon na an survey, lalo na kung dae pa gapoon o gatapos an campanya, harayo sa katotoohan
lalo na sa resulta nin eleksyon.
An pagpili nin candidato sa survey, daeng bayad, capital riwoy, caya masakit panubdan ta puro sana
pangaturogan.
An halaton ta iyo an mga survey na sa katahawi nin campanya o duwang semana bago an Mayo nueve,
ta tibaad lamang marina-rinaw na an tubig sa bobon.
Ini an babasaran kan mga partido o alyansa kung ano an gigibohon pag-abot sa mga huring aldaw, lalo
na sa oras de peligro.
Isi man nin gabos na pag nagtaltag na nin bitamina an mga lideres sa barangay y nainom kan mga
votante, an tunay na survey maluwas sa maquina kan Comelec.
*****
Mapa-survey man ako sa mga masunod na aldaw.
Satong helingon kung sisay man an mga topnotcher na kapurit, he! he! he!
Magayon man na laban ini, lalo na sa mga pinangaturogan na magin consejal, ta anas ini habo magin
kapurit, he! he! he!
Puede na kamo magpusta kung sisay an mga ini…

Leave a Reply

This site uses Akismet to reduce spam. Learn how your comment data is processed.

%d bloggers like this: