ISIP-ISIPON TA | qui Tang Tacio:

Hayahay an nakakua nin SRA

Igua palan nin diit na caribocan diyan sa EBMC y PHO.

Segun sa mga reclamador, an isyu iyo an pagtao kan inaapod na SRA, o Special Risk Allowance, na pigatao kan gobyerno nacional sa mga health workers na directing gakapot kang mga pasyente nin COVID-19, pati na an mga Persons Under Investigation (PUI) asin Persons Under Monitoring (PUMs) o itong mga suspect o probable cases.

Sinda itong mga na-assign sa COVID wards, ICU, isolation facilities y quarantine facilities.

Kaibahan man sa pigatawan an mga health workers na nasa privadong ospital.

Naitao man daa an SRA sa mga qualified health worker sa EBMC.

An hapot man sana kan mga dae natawan, lalo na itong mga nagka-COVID na mga health worker na bako man direktang gakapot nin pasyenteng na-COVID, ngata ta dae sinda binali sa listahan nin recipientes?

Sabi sa huringhuding, ultimo daang janitor sa Provincial Health Office na an kapot samhod y sighed, nakaresibe nin SRA kaiba an enterong empleyado sa Palawan magpoon sa amo pababa.

Igua pa nga daang ibang tawo na dae man direktang gakapot nin pasyenteng iguang COVID na nakakua kan SRA, pati na itong papel y bolpen an gamit sa pagtrabaho.

Magcacanigo na an bagay na ini maimbestigaran nin DOH o arin man na agenciang puedeng magtao nin riwanag sa isyu.

Bako ining diit na bagay na puede sanang pagbalewalaon, ta an invuelto dindi bako man sanang cuarta kundi an pagtiwara kan gabos na empleyados kan ospital y PHO na parareho an tratamiento saenda kan saendang mga amo.

Dae na paghalaton na kamo pagpaapodon sa junta provincial para hapoton kan mga honorableng bocal.

Atang panahon na nin campanya (maski dae pa sabi kan Comelec), puro na ini ginatlon magpahamot sa publico (dae cabali si defuntong Nestor) asin maisihan na igua man sindang pigaguibo afuera sa pangontrata, he! he! he!

Maguiromdoman na sa hearing kan Senado kan Oktubre, sinabi na kan COA na labing cabangang bilyon na bayad sa mga allowances sa mga health workers an kulang sa dokumento.

Igua man daang P214 million na binayad an DOH sa mga bakong qualificadong recipientes, bagay na nareparo kan mga senador na cotana gabos na sanang health workers pigtaohan kan SRA.

*****

Mapoon na an mga Misa de Aguinaldo sa aga, a-diez y sais kan Deciembre.

Sa Virac, an misa sa katedral mapoon alas cuatro nin aga. Iyo man ini an misa sa cadaclan na mga simbahan sa barangay, afuera sa tolong simbahan na alas sais nin banggui ngonian na Dec. 15, baging anticipada na.

An hurit kan Diocesis, magsunod an mga tawo sa physical distancing y health protocols sa pagsimba. Bawal an makitaning an mga soltero sa saendang mga daraga, iyo man an lalaki sa agom na babaye.

Dapat man sigurong magin istrikto an mga bantay sa simbahan sa mga magurang na bitbit an saendang mga aki.

Segun sa reglamento kan IATF sa Alert Level 2, an puede sana makalaog sa simbahan na 50% capacity iyo itong mga bakunado. Caya hanapan nin vaccination card an mga masimba, ikabit sa riog kan cada malaog.

Dati man na bawal magluwas an mga aqui na edad 17 pababa, afuera na sana kung fully vaccinated.

Igua kayang nakareparo na kan nacaaguing Simba, dacul na an mga aquing edad onse pababa (dae pa nabakunahan) na bitbit o karga kan mga magurang sa laog kan katedral.

Satong isipon na minsan an cadaclan sa gasimba bakunado na, bakong gustong dae na sinda tatablan kan COVID y maolakitan an mga omboy.

*****

Sa pagpoon man kan misa-misa, kaipuhan man mag-anuncio na an mga municipio kung ano an saendang polisiya sa mga maki-caroling y maki-Krismas.

Sabi ko na ngani, bawal pa magluwas an mga aqui edad 17 pababa y mas lalong bawal pa an mga mass gathering, lalo na an pagribot y pagpila sa mga harong-harong para maghagad nin pamasko.

Ano daw kung gibohon na reglamento kang satong mga politicong gataltag nin pamasko na an ipaheling kan cada nangrismas iyo an saendang vaccination card?

Madacul siguro an mapabakuna sa mga masunod na aldaw….

Leave a Reply

This site uses Akismet to reduce spam. Learn how your comment data is processed.

%d bloggers like this: