nagimathan ko na ining misa-misa
ta kang saladay pa kami
ilibahan ang bilog na familia
maski gapuray-puray sa kapuypuyan
boda nangurugkutog sa sobrang ripot
ta piga pilit ni nanay kasi tatay
kaya kang ako man nagka-familia
ilibahan man kami sa misa-misa
surugnudan sa motor kaming lima
si abeth kasi nennen sa enotan
si peachy kasi agom sa murhinan
sa tahaw, su driver, ako an
sisay ang dai mapacanta sa “gosos”
Birhen ika ang pinili
Ina-on nin Dios Aki
Ta burak kang nabugasi
Burabod ning pagkabini
o dai mapasanong sa adios
na piga solo ni caidtong tang laloy
o ni caidtong manong ponso
Adios Reyna del Padre
Madre del Salvador
naka atender na ako caini sa ibang lugar
pero dai sinda caining gosos boda adios
iyo, dai satong ga tilinda sa patio
ning mga caonon: suman, ibos, puto
pero igwang libreng salabat o goto
na hinanda ning mga grupo o baryo
atâ, macusog ang burus ning gracia
sa kafreskohan ning maaaga
sa siyam na aga ning misa-misa
boda namate sa satong kultura
ang pagka dayupot ki Virgen Maria
na adian sa satong gosos boda adios
ginaha talaga kita ni Virgen Maria
…. Isla amante de Maria
…………………………………………
*MISA-MISA- ngonian piga apod nang Misa de Aguinaldo.
Sabi daa dindi sana ini piga gibo sa Pilipinas bilang regalo
ning Simbahan sa satong nacion bilang iyo-iyong catolico
sa bilog na rona ning Asia.