ISIP-ISIPON TA | qui Tang Tacio:

Sungaw na an panaltag na gatas ni alcalde

Paimbestigaran daa nin magcapirang capitan del barangay sa Virac an pagtaltag nin municipio nin expired nang powdered milk kan nacaaguing semana.

Segun sa osipon nin mga chismoso sa kahadean ni Posoy, an saiya daang mga alalay sa Osip of the Mayor an nagribot sa mga disisais na barangay para magdistribuir kan Alaska Instant Powdered Milk.

An mga tinawan daang mga benipisyaryo iyo itong nasa listahan para sa feeding program para sa mga malnourished na aki na kinua kan mga alalay ni alcalde.

An problema daa, dae man ning hinubon na instruksyon an mga parataltag manongod sa gatas, kundi para daa sa mga kabali sa feeding program.

Nareparo pa kan ibang mga recipientes na expired na an patos nin fortified milk, ta an nakakahang duman sa rikod “consume before 31JUL2021B.”

Igua man cotana daang an expiry data sa Oktubre pa alagad kan buksan an mga patos, brown na an kolor kan gatas, imbes na puti.

Saro pa, an fortified milk daa dae puedeng ipainom sa mga malnourished na aki edad anom sagcod cincuenta y nueveng bulan ta macaonong ini sa saindang salud.

Puede daa ini sa mga aking anom na taon pataas an edad.

Segun pa sa mga sihongan, kan paisihon daa an alcalde kan nangyari, an simbag daa caini, an gatas daa para sa mga ina asin tugang kan mga benepisyaryo nin feeding, alagad sabi kan mga residentes nin barangay dae man nin sinabi an mga parataltag.

Igua na ngani daang nakatimpla kan gatas na kulay brown pero bako pang expired. Dae na daa natunaw entero an gatas ta gabirilog-bilog na.

Sabi pa, an fondong pinambakal kan gatas pinute pa sa treinta y ocho milyones na calamity assistance kan Malacanang sa Virac.

An gustong sabihon, parte pa ini kan relief operation sa bagyong Rolly.

Posibleng dae nabakal kan Deciembre 2020 ta baad dae pa man an fondo.

Alagad, kung binakal ini kan Enero ngonian na taon  para sa relief operation kan municipio pakatapos kan bagyong Rolly, talagang ma-expire an gatas ta dae tinaltag dagos.

Harimbawa man dae pa sana naawat mabakal kan administrasyon ni Mayor Posoy, an hapot ngonian ngata ta nag-ako sa supplier nin gatas na harani na mag-expire.

Posibleng an adayo kan alcalde y mga sulsoltant caini, diit-diiton an pagtaltag kan mga natada pang relief goods, tanganing makaabot sa katapusan nin taon o sagcod sa campaign period tanganing maguiromdoman pa kan mga votante.

Ini an masakit minsan sa mga lideres na imbes na gibohon an dapat na trabaho para sa mga constituentes, an masunod na campanya an tinatawan nin prioridad.

Tuyong pigaluway-luway an pagtaltag kan tabang tanganing pirme sanang maheling sa Facebook an pagduhor sa mga pobreng tawo sa barangay.

Idagdag pa an realidad na an mga ini habo na ipaagui an tabang sa mga capitanes na bako nindang kaalyado.

Kaya maabot man an bagas, delata, noodles o gatas, mapaso na, pambahog na sana nin orig.

*****

Sa mga sulsoltant, puede pa man ini malusutan an problemang ini kan municipio.

Puede sindang magsabi na iguang nakalusot na espiya hari sa campo ni Samuel y tinusok nin dagom an mga patos nin gatas. Alagad masakit man panubdan an siring na istorya, ta kung totoo ini, dapat sisantehon an mga guardia diyan sa istakan nin relief.

Mas magayon pa ngani sigurong sabihon na sana kan mga tawo sa Osip of the Mayor na an gatas na bako pang expired alagad brown na an kulay, dinagdagan nin Blend 45 na kape kaya arog kaito an kolor, he! he! he!

Marinas na halaton na sana kan municipio na iribod kan mga capitan an expired asin brown na gatas. Puede ining itimpla asin ipainom sa ginatos na casual sa municipio, tanganing maghayahay man lamang an saendang pagmate asin magin matibay an saendang mga tol-ang.

Harimbawa man na magbugris an mga ini, dacul pa man sigurong bolong diyan sa RHU, puede pa sinda ikahang sa quarantine facility kung sabayan pa ini nin calentura, libre man pati an pagcaon, he! he! he!

*****

Kung an mga navictima nin cryptocurrency scam sa Panganiban y kataraning na banwaan nagkusog nin boot na maglantad para makasuhan an mag-agom na responsable, dapat gibohon man ini kan mga nadaya man sa bitcoin investment kan mga nacaaguing taon.

Sabi kan mga nacaisi, milyones de pesos man an tinabag kan mga ahente nin bitcoin, na pina-seminar pa an mga bibiktimahon sa bag-ong hotel.

Caya siguro dacul na mga propesyunal, negociante y mga opisyales nin gobyerno an naengganyo mag-invest nin dae mababa sa dos cientos mil pesos hanggan sa tres milyones pesos.

Dae na naheling an calag kan mga agente nin bitcoin, minsan sige an siringil kan ibang investor na inutangan pa an tinaya sa daendatang negocio. Inodo na siguro kan mastermind an saendang cuarta…

Leave a Reply

This site uses Akismet to reduce spam. Learn how your comment data is processed.

%d bloggers like this: