ISIP-ISIPON TA | qui Tang Tacio:

Ihanda na ang mga putahe para sa 2022

Sa mga masunod na semana, titimplahon na an mga ihandang putahe nin mga politico sa daculang kapiyestahan sa Mayo nueve, dos mil veinte dos.

Sa ngonian, pigasaro-saro na katipuna an mga recado, carne y sila, tanganing dacul na pagpilian an mga votanteng mahabhab sa halabang lamesa kan Comelec, he! he! he!

Ini an eat-all-you-can na restawran na an babayadan para maghabungal iyo an makaon, he! he! he!

*****

An enot sigurong mabago iyo an mga chairman kan mga partido political sa Isla Maogma.

An Partido Liberal dae ngonian nin payo, ta an dating amo caini dagos nagbaryo nin kudal sa PDP-Laban matapos na manggana si Pay Digong.

An PDP-Laban man dae masabotan kung sisay na an amo, ta an chairman dae man sa puwesto, y si Gob Boboy y Cong Hector piga-recruit ngani daa ni Energy Sec. Cusi na magin miembro kan PDP-Laban tangani daang maipadagos an submarine power cable, he! he! he!

Ang NPC baguing dae man nin bossing ta an dating chairman nasa partylist group na.

Saro pa, sa sakong pagcaisi, si Boboy Cua aduman an sa partidong UNA ni Jejomar Binay, mantang si Cong Hector nakabali na sa Lakas-NUCD.

An gabos na ining kagamohan sa partido nangyayari ta caipuhan an mapirma sa Certificate of Candidacy sa pag-file kan mga makandidato sa primerong semana kan Oktubre.

Dae man an nin epekto sa campanya o sa eleksyon, ta an importante sa mga votante, iyo an ipanaltag kan saendang mga candidato.

*****

Saro sa posibleng maka-afectar sa desisyon kan gobernador iyo an kasong inaatubang niya sa Ombudsman dahil sa Palnab shipyard.

Kung harimbawang dacula an posibilidad na ini masuspinde otro siring kan nangyari kan 2019, mas magayon para sa saiyang mga parasunod na si Bos Te na an magkandidatong bise gobernador. Ini tanganing kung masuspinde man si Boboy, Cua man giraray an matucaw, daing problema. Magigin bocal na sana si Bise Abundo.

O caya, magbaba sa Virac an gobernador para magin alcalde, si Bos Te an gobernador.

Dae man daang problema qui TGP Cong. Bong kung si Bos Te an magigin bise, ta an suporta niya qui Bise Abundo kung iba an kalaban.

Igua na daang enot na paghororon si bise y an gobernador manongod sa line-up kan Tamang Timpla, caya lang dae pa nasiguro kung ano gigihohon kan barista, kung kumpleto nin gatas y asucar an maisog na kape.

*****

Diyan daa sa San Miguel, dae pa nacierto kung sisay an makalaban ni alcalde Jun Camano na madalagan kan icatolong sunod na termino sa puesto.

An nagretiro sa DAR na si Alex Teves makandidatong PBM sa linyada kan Tamang Timpla, caya an posibilidad na sana an tugang caining consejal na si Tony an magdalagan bilang mayor.

Sa bise man, nagdeclarar na si Lt. Col. Noel Morales na siya interesado magin presiding officer kan Sangguniang Bayan ta maretiro na daa ini sa servicio sa katapusan nin bulan.

An magiging kaduwelo caini an presenteng consejal na si Rudy Torrente, na nagin topnotcher kan 2019.

Segun sa osipon, pakandidatohon daa ni alcalde Camano an saiyang aqui na si Francis bilang PBM sa East District. Posibleng preparasyon ini na itukal ni mayor an aqui oras na siya mag-graduar na sa San Miguel.

*****

Segun qui TGP Cong. Bong, ciento porciento daa an saiyang suporta qui Gob Boboy y Cong Hector, ta habo niya nang dacul na iriwal sa liderato kan Islang Maogma.

Panahon na daang magcaigua nin marinas na palakaw y asenso an provincia.

Dae na daa siyang plano na magcandidato pa bilang gobernador o congressman kan isla. Harimbawa man daang makagraduar siya bilang partylist representative kan TGP sa 2028, mavuelta na lang siya sa Baras para mag-alcalde.

Leave a Reply

This site uses Akismet to reduce spam. Learn how your comment data is processed.

%d bloggers like this: