Dae pang pinal na report ang Environmental Management Bureau (EMB) manongod sa naglataw-lataw na suspetsadong duhay diyan sa dagat sa iguang piyer kan Virac kan fecha 15 nin bulan na ini.
Nag-investigar na an mga taga-EMB sa mga personajes kan PPA Virac asin mga barkong nakaduong kan aldaw na ito, pati na sa Coast Guard.
Sabi palan kan PCG, bako man daa itong dugui na hubon kan mga trak haring ibong kundi segun sa saenda, tibaad hari duman sa ginabang edificio na dating okupado nin paratienda nin appliances.
Halaton ta na sana kung ano an maluwas, kung dugui itong naglataw-lataw o tunay na duhay.
Para mientras gahalat, magayon na mamanwit diyan sa tampad kan Coast Guard nin sandig, ta siguradong mataba na an mga ini sa saendang kinaon na odo, he! he! he!
*****
Mapabidding palan an DepEd division office sa July 6 nin nin maabot sa siete cientos milyones pesos na halaga nin mga school building projects.
Segun sa mga chismoso, an sarong parte gakahalaga nin P595 million y an icaduwa P104 million.
An mga ini binarangabanga sa mga cluster na sobrang treinta milyones an saro, caya an cadaclan na mga contratista sa Isla Maogma dae puede magbali, bakong mga maogma, he! he! he!
An puede sana iyo itong Medium A an category, na an pinakadakulang proyecto sa edificio dapat mas halangkaw pa sa P30 million.
Dakulang imo ini kung P700 million an halaga kan itao sa kung sisay man na contratista.
Kung sisay an magana, maghapot na sana tabi sa superintendente, an assistant niya, y an mga halangkaw na amo sa division cabali na an Tres Marias, he! he! he!
Dae na man maghapot kung makinabang man an satong mga lideres, uha, alam na!
Magpoon ngonian na bulan hanggan sa Deciembre iyo an panahon nin pag-agahid nin deligencia sa fondo nin publico (cabali an enterong familia ni Nestor, gadan man o buhay).
Daei sinda puede magpabayleng iguang Pantomina, magpa-raffle o magpa-concert ta bawal.
Caya kung bakong sinda an manghoholdap sa mga contratista, sinda mismo an mangontrata tanganing matubis an laog kan agahid.
Harimbawang maheling ninyo o saendang aki na namiadan sa sarong proyecto, hari na tabi pagreparo ta tibaad masibol pa, he! he! he! Sainyo man sanang mga banal na votante mapunta an ganancia kaiyan…
*****
Igua palan nin nadakop na kagawad nin barangay asin saro pang mga persona sa tupada duman sa Manambrag, sa kahadean ni alcalde Boss Te, kan Domingo, June 27, 2021.
Mayad pa an kapulisan nin Calolbon ta aktibo sa campanya kontra sa illegal na pasugal.
An hapot nin mga ciudadano sa Virac, noarin man daw sasalakayon an pabulang diyan sa farm kan dating alcalde na kaibahan sa mga parokyano an mga capitan del barrio y mga empleyado sa gobyerno.
Maarabot daa an mga parabulang aga y maparibod alas ocho na nin banggui, purula na an mata sa kamamaan sa online sabong sa daculang TV.
Igua man siguro ining permiso qui alcalde Posoy ta igua daang taga-municipio na ga-isyu nin resibo sa cincuenta pesos na entrance fee. Kung dos cientos na tawo an parokyano caini oro-aldaw, maka-diez mil man an manejamiento, dae pa cabali an porciento kan gana.
Ngonian, an hapot: kung iguang permiso an mass gathering na ini? Ta lo mismong an operasyon nin mga bulangan dae na tinugotan kan IATF, cotana dae man puede magtiripon an mga parapataya sa sarong lugar, masque pa iguang permiso an online sabong.
Dae na tabi magmurong an autoridad kung an suspetsa kan mga ciudadano iguang seminal na mga paikim an mga halangkaw na opisyal nin sa PNP y municipio.
*****
Nag-asumir na palan kan Lunes an bag-ong presidente kan CatSU, si Dr. Patrick Azanza.
Tapos na an eleksyon, gana an hababa, daog an bilogon pati an halangkaw. Sa otro naman ang daendatang iriwal.
Sa mga masunod na aldaw, magayon na saro ngona an isip nin mga taga-CatSU tanganing magcaoroyon sa direksyon na gustong sunodon kan bag-ong amo.