Talagang panahon na nin politica.
Diyan daa sa Virac, afuera sa dating nang magkaribal na si alcalde Posoy y dating Mayor Samuel, igua pang nagbotwa na macandidato daa sa 2022.
Si dating PBM Idoy Tablizo, na naka-pangsiyam sa karera sa consejo municipal kan 2019, nagpahayag na daa na an tocawan ni Posoy an target niya.
Posibleng na-inspirar an dating bokal sa kapangganahan kan abogado minsan kulang daa an cuarta. Kung nakakua na nin nakalubong na kayamanan an PBM o caya nagtama sa lotto na dae ta naisipahan, bahala na kamo maghapot-hapot.
Libre ang pangaturugan, an gabos puede magcandidato lalo na an makasuerte kan jackpot sa 6/58, he! he! he!
*****
Maguiromdoman na solamenteng si Idoy an nagreparo sa consejo municipal na sagcod ngonian dae pa naresolveran an kaso in Consejal Toy Gianan na ma-sarong taon nang dae ga-atender nin sesyon.
Sabi ngani ni Idoy, nadisturbo daa siya sa nangyayari bilang saro sa mga constituentes na dae nasirvehan kan consejal na grabe an takot sa coronavirus.
Kan nacaaguing semana, dae man daa nagcaoroyon an mga consejal asin an mga inimbitaran caining mga eksperto hari sa Civil Service, provincial legal office asin iba pa kung ano an gigibohon sa problemang ini.
Awat nang tinaohan nin poder kan consejo si Bise Mayor Arlynn na mag-sangat nin magcacanigong kaso laban sa ausenteng consejal alagad baging dae pa man nin nangyari.
An masakit caini kung an enterong consejo na an kasuhan kan ribong na ciudadano kung sige pa an luway-luway nindang pagtratar sa isyu.
Puede man cotanang ideclarar na temporarily vacant an tocawan ni Consejal Toy base sa ilinuwas na administrative order ni Pay Digong tanganing iguang representasyon an saiyang constituentes sa consejo.
*****
Igua na palan nin bag-ong amo, ay sala, ama diyan sa DepEd division office.
Nag-abot na daa si Dr. Susan Collano, an dating officer-in-charge kan CamSur division office, bilang kasalida ni dating SDS Dr. Danilo Despi.
Kasabay sa daculang karatulang tinakod sa gate kan division iyo man an sarong tarpaulin na gapasalamat sa mga naginibohan daa ni Despi sa Isla Maogma. Kung ano an mga ini, dae man piglista.
Segun sa mga pakialamero, an mayor daang magiging problema kan bag-ong ama sa dibisyon iyo kung sisay an sainyang titiwaraan na mga kairiba sa oficina.
Awat na daang iguang sirintikan diyan sa complex, lalo na itong mga nag-arambisyon maging mga amo na an iba umuwi nang luhaan, segun sa nga chismoso.
Adyan pa an mga simbagon na isyu sa hearing kan junta provincial, lalo na itong manongod sa 3Ms, mga dagang binarayadan y an catorce milyones pesos na feeding program na tinaboga ni PBM Tanael sa sesyon.
Herac man si SDS Collano, diretso sinung-ag sa calayo…
*****
Atang gaabot na sa tres cientos cincuenta an kilo ning maayad-ayad na sila, naghalangkaw na man an presyo nin carneng orig.
Idagdag pa an halangkaw man na presyo nin gulay, talagang tios na an cadaclan kan satong mga kahimanwa, lalo na itong mga familiang an ama o mga aki nawaran nin trabaho dahil sa pandemya.
Dae ta man mabasol an mga paratienda kung iyo na an an presyo nin sila, ciento sisenta an ordinaryong turay, dos cientos an saday na bangkulis, kung an pabakal saenda kan mga parabanwit dati nang halangkaw dahil sa macusog an dagat.
Sa parte man nin carne, kulang na an suplay nin orig sa isla matapos na halos mil cuatro cientos an linubong dahil sa ASF. Dae pa dindi kabala an mga binuruno kan mga cagsadiri bago pa man nag-depopulate an mga autoridad.
Grabe an pamasol kan iba kung ngata dae sinda nagtanom nin gulayon pakatapos sana nin bagyo kan Noviembre. Cotana igua sindang mga verdeng tinanom na puedeng sahogan nin sardinas o meat loaf na relief.
Pabor man cotana sa sociedad na mabawasan an pagcaon nin karne, alagad ta mahal man an sira asin gulay, pahingorag ngonian an habhab nin maluto, kaya hayblad man siempre an resulta, he! he! he!