Sagcod sa ngonian, dae pang ciertong impormasyon ang pulis sa Virac kung sisay an mga nangholdap daa sa sarong principal asin an saiyang agom na taga-division office kan Enero dose.
Segun sa nacaising opisyal, totoong armed robbery an nangyari, ta an mga suspetsado armado nin Armalite asi nadara ninda an duwang selpon kan mag-agom y an cuatro mil quinientos na cuarta sa bag kan babayi.
An nakaribong nin payo, kung ngata ta an mag-agom na parehong empleyado sa DepEd an tinarget kan soboot holdaper. Kung holdapon man sana daa an hanapon, mas dacul pang harong o tindahan sa ibang lugar an iguang mas daculang cuarta. Ngata ta duman pa pagsusô sa looban kan San Lorenzo Village sa Bigaa?
Tapos na man daa an pangubra nin bonus o dagdag na benepisyong itinao ni Pay Digong, y dae man nin negocio si principal.
An hapot kan mga chismoso sa kahadean nin garalayog na slab, kung an pangholdap na ini conectado sa caribocan diyan sa division lalo na daa sa pagpalayas qui Superintendente Despi.
Maguiromdoman na iguang nagluwas na fb account na sdo catanduanes kung saen tinaboga caini an mga opisyales kan division office sa pagsamba daa sa politico y pagtraydor qui Despi.
Sabi kan sarong sihongan, pinasusod na daa sa mga hacker kung sisay an nagibo kan fake na fb account y an soboot IP address nasusod sa luwas kan isla o nasyon.
Sa ngonian, dae pa maisihan kung sisay talaga an mastermind sa armed robbery kuno sa mag-agom na Vegim. Halaton ta na sana an resulta kan imbestigasyon kan pulis.
*****
Sayang na dae nagdecider an NFA na idispatsa an nalabong bagas sa nagabang bodega caini sa San Isidro Village.
Cotana, sa enot na semana nin Noviembre pinanaltag ini sa mga gaataman nin orig para gibohon na bahog.
Ngonian na mabata na ini, masque siguro an mga orig na dae naolakitan nin ASF, masayumang caonon an nalapang bagas minsan ayonan pa nin ginalon na pahamot.
Sa otro ngani, bagohon na man kan NFA an saendang reglamento sa pagdispatsa kan nalabong bagas.
Simple man sana an solusyon: ipa-inspeksyon sa auditor nin COA sa capitolyo, asin hagadon an asistensya nin mga alcalde.
Sa mga mayor na an cada aldaw campanya para sa masunod na eleksyon, tatakmaon caini an bagas, labo man o bako, basta libre, he! he! he!
*****
Nagcaigua palan nin sulo sa Virac kan nacaaguing semana.
Masuerte man an mga bumbero ta maaaga nangyari.
Sabi kang sarong tambay sa tinampo, kung ini daa nangyari kan ginamit an firetruck na caro nin gadan na fireman, posibleng magcaproblema an BFP magdesisyon kung idiretso an tigbak sa camposanto o ihulog ngona sa gilid an cajon para magresponde sa sulo.
Inda man kuna kasuarin ini nagpoon an tradisyon na samnohan an firetruck y gamiton na caro nin gadan, minsan pa amo o bumbero an natigbak.
Kan mga nacaaguing taon, ginamit man daa ini nin sarong opisyal. Habang sigeng ingaw kan wangwang, nag-agi daa ini sa Rizal Avenue sagcod na makaabot sa oficina kan agom, kung saen nagbaba an opisyal bitbit an sarong bugkos na rosas asin dinuhor sa agom kan Valentine’s Day.
Saarin man daw gagamiton nin pulis an mga patrol car sa pagdapit nin gadan?
*****
Aktibo na naman palan an mga nanakot sa mga negociante na soboot NPA.
Iguang inapodan na cagsadiri nin tindahan kan nacaaguing semana, na pighagadan nin suportang cuarta para daa ipambakal nin M16 sa halagang ciento cincuenta mil pesos cada saro.
Dae man midbid kan soboot kumander an inapodan, basta an isi niya igua ining negocio.
Awat nang patanid an pulis sa mga ciudadano sa isla na dae pagtubodan an arog caining mga panghagad ta an mga nasa rikod mga manloko.
Igua na ngani daang nagpadara nin cincuenta mil sa sobrang takot.
Segun sa sarong opisyal, salidahan na sana an sim card tanganing dae na makaapod an mga scammer.
Bahala na caini an mga nakaresibe nin apod kung mapaloko o dae…