Igua nang mga daraculang LGU sa Metro Manila asin iba pang lugar, kaiba na an Legazpi City, an nagtagama na nin fondo para pambakal nin bakuna sa COVID-19.
Marinas man cotana na an mga local na gobyerno sa Isla Maogma igua man nin natipon na cuarta sa siring na objeto, para sa salud kan saendang mga constituentes.
An problema sana, cadacul daang mga municipio an namakal na nin mga equipaje sa construction asin pag-oma, gamit an idinagdag na fondo ni Pay Digong duman sa mga tinamaan nin bagyo.
An cadaclan man, ipinadagos an mga proyectong an makinabang an mga contratista y mga elegidong opisyal.
Kung igua sindang piglaen na fondo para sa COVID-19 vaccine, dapat maisihan kan banwaan.
Isipon tang an babakalon kan Malacanang hanggan veinte cinco milyones na doses sana. Minsan para na ini sa duwang saksak na kaipuhan, diit na porsyento sana kan populasyon an mababakunahan.
Herac man an dae maabtan kan bolong, hari man ini sa Tsina o sa Estados Unidos.
*****
Nagpoon na naman an pabulang sa sports center ni Poroy, tabangan nin Dios.
Alagad dae dagos mabawi an ginastos sa pagpahingayad kan atop asin iba pang pinarid ni Rolly ta kulang an galaog.
An iba daa cayang mga mahilig sa espadahan nin mga maldos, aduman sa Palta minadiretso tanganing makataya sa global cockfight, dae pang entrance fee, he! he! he!
Kung noarin mamuklat an mga nanunungdan na tuyong gapiyong, dae ta isi. Mahalat sigurong magreclamo an presenteng gamanejo kan bulangan ni Poroy, tabangan otro nin Dios.
*****
Pakatapos kan rinugtong ni Pay Digong laban sa mga district engineer na soboot kakomplotan kan mga congresista sa mga maanomalyang proyecto, quinceng mga DE an tinangkas sa puesto ni Secretary Villar kan DPWH.
Hanggan sana an diyan, ta siguradong dae kaya nin Malacanang na kalabanon an Congreso, an pinakadakulang crocodile farm sa enterong Pilipinas.
Ta lakop na an barakalan nin voto, an gabos na mga congresista iyo an tunay na amo kan DPWH district sa saendang lugar. An habo makisama, isabod sa kung saen.
Tangani daang mabawasan an mga daya sa proyecto y an deligencia kan mga politicong ini, nagpaluwas na daa nin orden an DPWH central office na magpoon sa ngonian na taon, an gabos na maganang mga bid, dapat anom sagcod diez porsyento an baba sa budget kan proyecto.
Kung ini masunod, mabawas man an deligencia kan mga holdaper na politico na an hagad diez hanggan diez y ocho porsyento, kung mag-oho…
Kung habo an mga holdaper in barong, pasensya an mga contratista sa diit na kita y mas lalong pasensya an publico (dae na cabale si Nestor) ta puro na naman ampaw an satong bag-ong tinampo y edificio.
*****
Iguang caribocan sa DepEd division office, ta an amo daa caini mapaaram na sa otro semana.
Segun sa mga chismoso, igua na daang orden an regional office alagad an mga kaalyado daa caini sa division habo y nagparibot na nin petisyon para papirmahan sa mga principal.
Saro daa sa mga parasunod ni Despi an nagibo pa nin account sa facebook tanganing tabugaon an mga soboot gusto sa amo na tuta nin mga politico. Napilitan lugod an division na magpaluwas nin noticia kan saendang tunay na fb account.
Dae na cotana magparasaginsagin pa an gabos. Awat nang iguang impluwensiya an mga politico sa hiwas kan DepEd, lalo na sa pag-ako kan mga rekomendasyon ninda sa gustong makakua nin puesto sa mga escuelahan.
Bako man na mga santo an mga amo sa DepEd Catanduanes, lalo na pag-abot sa pagpa-bidding kan mga repair nin mga escuelahan asin mga office supplies. Awat nang iguang mga satanas asin disipulos diyan, lalo na itong mga naoringan sa kusina y an mga harani sa trono, he! he! he!
Igua ngani diyan nin proyecto na invuelto an pagsalida nin yero sa atop kan nakaaging taon. An ginibo kan contratista, dae man sinalidahan gabos ngudi binaliktad an mga puede pa man na mga lumang yero saka pininturahan nin verde, he! he! he!
Halaton ta na sana kung sisay an makatokaw sa trono ni Despi asin iba pang bakanteng posisyon sa division.
*****
An huringhuding magairibahan na daa si Manay Siliwong, Bise Shy, Posoy, asin dating Cong Cesar sa 2022.
Igua na daang mga tawong sinugo para mag-organizer nin grupo sa mga barangay.
Siguradong pag-abot kan Semana Santa, igua nang mga mabakasyon na pinangaturogan na maging poderoso, lalo na itong nakatipon na nin sining-otan na kayamanan na ipanaltag man sana.
Alagad dae ngona kita magtubod sa mga bagay na ini ta si Tiptip daa gaambisyon man sa Congress y si Tang Sario sanay mag solo-solo-solo.
Tibaad dae pa ini magkaoroyon sa gastosan lalo na ta iguang mga boksingero sa grupo, he! he! he!