Nagpoon na an campanya para sa 2022 national and local elections.
Kan nacaaguing semana, nagvisita si Senador Bong Go, guyod an artistang si Philip Salvador asin bitbit an mga amo kan DOH, DA asin DSWD, para manaltag nin relief asin bisikleta sa Virac y Bato. Bagi na man talagang presidente, he! he! he!
An mga toltol na nacaheling kan palabas nin senador masuka-suka sa kauyaman.
Duman man daa sa Panganiban, ginibohan na daa nin isyu an soboot mabagal na pagtao nin relief sa mga victima ni Rolly. Segun sa mga chismosong kaalyado ni alcalde Robles, pigapugulan daa ni PBM Obet an mga italtag tanganing siya an magribot caini sa barangay.
Simbag man kan PBM y dating three-term mayor, sisay man siya para pugulan an ayuda kan capitolyo?
Diyan man sa Virac, tinaboga kan mga soboot trolls ni alcalde Posoy an administrasyon ni Gob Boboy matapos na maisihan na magcapirang patos nin pigaamag na bagas an itinaltag na relief sa Igang.
Inako man ini kan provincial y natocalan ensegida, alagad padagos an pag-atake sa social media.
Igua naman daang nagluwas na post sa Facebook sa parehong insidente alagad duman sa Simamla. An kaibahan caini ta an ginamit na litrato pigshare hari man sa post ning taga-CamSur.
An suspetsa daa pano kan Campo de Silencio an gobernador an macandidatong alcalde sa Virac tanganing palugaran si Boss Te sa capitolyo pakatapos kan sainyang termino sa Calolbon.
Iyo na ini! Harani na an kurokuso kan politica. Pag-abot kan Enero 2, formal nang mapoon an giyera sa politica sa Isla Maogma.
*****
Sabi daa ni Sec. Briones kan DepEd, ibalad na ngona daa an mga nalabong modules kan mga maestro y estudyante sa mga binagyong lugar.
Dangan, bahala na daa an mga escuelahan mag-imprenta ning bag-ong kopya nin modules.
Ano daw kung mamasyar man si Briones sa Isla Maogma tanganing maheling niya an camogtacan kan mga escuelahan asin an mga maestro y maestro na nagkauruyagan man nin harong?
Tanganing maogma an gabos, magbitbit na siya nin mga generator para tigsadan an gabos na mga sir asin mam, isabay pa an papel asin ink sa mga printer.
*****
Igua palan nin taga-isla sa Maynilang kayganda na nagpadara nin cuarta sa magurang na binagyohan ni Rolly.
Habang nasa halabang pila an magurang para magkubra sa Palawan Express kan fecha 12 nin Noviembre, nag-apod an aki.
“Tay, binaha kami ni Ulysses,” sabi kan aki. “Pakibarik na sana su imo.”
“Dai ko pa ngani nakua,” agrangay kan pobreng magurang.
Kung nakaantos man si Tay sa counter para kubrahon an cuartang iribod man sana, dae na naisihan kan usisero…
*****
Sa mga dae nangaturog ta dae nakaheling nin palabas sa TV o cable, bakong overprice an pagdoble kan presyo sa pagpakabit nin satellite TV dish.
Pakatapos daang piridasohon ni Rolly an mga wire kan cable TV, an bayad sa pagpakabit nin satellite TV naghalangkaw magpoon sa dating dos mil, ngonian cinco mil na. Natural, an iguang cuarta dae maduwaduwa.
Iyo man ini an nangyayari sa mga ibang bakalon sa Isla Maogma. Atang nagrisiko na an mga tinapay, nagmahal man an presyo caini.
Pati nganio sebolyas, kulang na an mahiling mo sa mercado (bakong si Orly) ta an kua daa kan mga paratienda sa supplier, dos cientos cuarenta na an cada kilo.
Sa silaan man, an turay ciento cuarenta, ciento sisenta an bangus, an imported na malughaw dos cientos veinte, y an dating pigahaboan na dorado ta maluyang clase, dos cientos cincuenta an cada kilo.
Ano nang pagtios ini!!!