pakatapos ning hagusuhos
bagsak ang mga cable
bagsak ang mga garahe
bagsak ang mga masitas
ang kapaributan
paghil’ngon basurahan
mga tinampo dai maaagihan
pero sa mga simbahan
tindog ang mga cruz
sa mga bagtingan
buhay ang bubong
punta ning paglaom
tinilipon su mga na-gabâ
diit-diit pinarako, ginarakot
sagcod na makapatindog
naging mas macusog pa lugod
dai na pighalat mga pangako
ning mga poderosong hunyango
na minabandera sa mga tinampo
sabi casu para-banwit
pag nag hupâ ang dagat
mabalik mas dacol na silâ
sabi casu para-hag’ot
matubo ang mga abaca
mas dacol, mas mataba
ika, catandunganon,
pinasarig kang padlos
ning panahon na maisog
ta nakatugmad sa dignidad
ning masarig na pagtubod