qui Tang Tacio
Inaprubaran na palan kan junta provincial an resolusyon ni PBM Dok Zafe na gahagad na ibalik sa Department of Health an pagmanejo sa Eastern Bicol Medical Center..
Segun sa resolusyon, golpi na an itinaong subsidy kan capitolyo sa EBMC magpoon na ini gibohon na economic enterprise kan 2011. Ta dai kaya kan local na gobyerno na ipadalagan ini nin toltol, segun qui PBM Zafe, mas marinas na ibalik na ini sa DOH tanganing maasigurar an magayon na servicio para sa constituentes.
Awat nang problema ini. Bago pa man ini naging eco-enterprise asin sagcod kan panahon ni Cong Cesar, gabos na elegidong congressman nagproponir na ibalik na an EBMC sa gobyerno nacional. Ni saro daing nangyari ta habo an DOH, habo an liderato kan Congreso.
Dagdag gastos, dagdag budget para sa DOH, dagdag pa kulog nin payo, lalo na ta sa islang Catandungan anom an ospital pa an pigamantenir kan provincial afuera kan EBMC.
Magayon na an resolusyon na ini pasundan man ni Cong Hector, na sagcod ngonian naka-keeping sa saiyang mansion lalo na ta siya senior citizen.
An maray na rason iyo na an DOH dapat iyo an magkapot sa designated sentinel hospital sa mga provincia, arog kan EBMC, tanganing madari makahiwas sa anuman na infectious disease, arog kan coronavirus, na posible pang umabot hari sa China asin ibang lugar.
Sa paagui caini, mas mapagayon kan DOH an magmanejar kan national health care system, lalo na sa panahon ning pandemic.
*****
Gaapelar man cotana an Simbahan na Romano Catolico na buksan na an mga cathedral, simbahan y kapilya para makapag-atender na nin Banal na Misa an mga paratubod ni Cristo.
Segun sa CBCP, puede man daang observaran an mga health protocol sa mga actividad sa simbahan.
Minsan cabanga sana kan capacidad an ipalaog, dadagdagan man an misa apesar kan online na selebrasyon para sa mga gurang y mga natalaw sa coronavirus.
Kung iguang kasal o bonyag, sarong padis sana daa an mangaki. Dae nang mga abay, ring bearer, secondary sponsor asin iba pang mga artista sa pelikula tanganing simple sana daa an kasal.
An gustong sabihon caini, kung bawas na an gastos kan maagom o mapabonyag, diit man an marecibing regalo ta duwa na sana an mangaki. Lugi ang pakasal, dae makabawi kang handa, he! he! he!
Posibleng magpaluwas man nin protocol sa handaan. Kung talagang grabe an imbitado y dae makanigo sa ARDCI, Lucky Hotel o Rakdell, duman sa Plaza Rizal o Sports Center. Kung politico, puede na duman sa athletic complex, basta ibali sa handa sa cada lamesa an tigsarong tabla nin Biogesic y apat na pamaypay, he! he! he!
Harimbawang talagang bawal pa an mass gathering minsan bako nang GCQ, barangabangaon an rinuto y ipatos na sana depende sa kadakulan kan visita. Pagtapos kan misa, ipanaltag na sa gabos na nag-atender, bagui man sanang tandan sa padasal, he! he! he!
Kung iguang mga walang tamoy na nagsusod sa harong kan kinasal o nagpabonyag, magkahang na sana nin water dispenser sa trangkahan, alagad an ilaog cerveza, Ginebra o Tanduay, papilahon an mga makiinom sabay hungit ning tigsarong kutsara nin dinuguan, he! he! he!
*****
Segun sa mga siyentipiko sa China, an coronavirus daa nahiling sa semilya kan mga lalaking Intsik. Entonces, puede palan makaolakit an mga parapamagat minsan naka-face mask basta dinodo an saendang garod, he! he! he!
Maski palan mangarigos nin alcohol an mga parokyano kan Calle Mabole, dae puedeng makiubay sa agom ta igua pang darang dagdag na venino.
Saro sa mga sobrang tinamaan kan pandemic an mga establisimiento sa Calle Mabole, lalo na ta an mayor na trabaho kan mga empleyado dindi iyo an paghapiyap sa mga parokyano.
Mapan-o na daw an mga ini pakatapos kan GCQ kung imantenir an social distancing?
An luwas caini, puro na sana floor show an palabas y hanggang riwoy na sana an maipaluwas kan mga customer habang sige an inom nin alak, he! he! he!
Magayon na mabisita man kan TESDA o arin pang agencia an Calle Mabole tanganing paadalon nin iba pang hanapbuhay an mga GRO, afuera sa pag-ilaid y paggibo nin ginamos.