Gamiton na an mga hotel para sa quarantine

qui Tang Tacio

Dapat palan daa sa Lucky Hotel o sa ARDCI Corporate Inn pinadagos an mga treinta y cuatrong na-stranded duman sa Tabaco asin pinabalik sa isla kan sarong semana para sa pitong aldaw na quarantine.

Segun sa mga nacaisi, dati na daang na-inspeksyon kan mga taga-PHO an edificio kan College of Business Administration sa CSU y inapobaran ini bilang quarantine facility.

An problema ta igua daang local na politicong nagvisita kan pag-abot kan 34 kan Abril 14 y nagsabi na kung ano daa an saendang caipuhan ipaabot sana sa local na gobyerno.

Magpoon daa kaito igua nang representante an grupo na iyo an nagpaabot kan saendang mga kahagadan.

Dapat daa bako sanang ceiling fan an nasa cuarto ta mainit, y an kubeta dapat shower an karigosan. Nagharagad pa nin kutson y ulunan sa cada kama pati inuman na hot-and-cold dispenser. Kaya daa napilitan magbakal an capitolyo y an municipio tangani sanang mapanoan an saendang mga hagad.

Dae man daa cotana kaipuhan an electric fan ta mahayahay sa laog, lalo na kung nasa icaduwa y icatolong escalon an cuarto.

An dati daang napagcaoyonan, kung ano an pangangaipo ninda, an sadiri nindang mga familia an matao. Alagad nagsayuma daa an mga stranded ta an rason pagcanigoon na sana an anoman na tabang na itatao kan gobyerno.

Ta igua pa daang halos cincuenta katawo an gusto na man magparibod sa isla hare sa mga manlaenlaen na lugar sa Bicol, maghiwas na cotana an capitolyo na ocuparon na an Lucky Hotel, ARDCI Corporate Inn, Rakdell Inn, Midtown Inn, Queen Maricel Inn, RHAJ Inn, Kemji Resort, Marems Pension House asin iba pa tanganing iguang marinas y comportableng dagosan an satong mga kahimanwa na gadulag sa COVID-19, he! he! he!

Ito daang mga nag-arabot naman sa Tabaco, nasa pitong aldaw na quarantine sa Tabaco NHS bago ini pasakayon sa ferry y pag-abot sa Virac, ma-quarantine naman sinda nin catorceng aldaw.

Maghanda na man siguro an capitolyo y municipio nin marinas-rinas na pagcaon na irasyon sa saenda sa oro-aldaw. Magpatagama na nin malasugui, tangigue, liempo y lomo sa saod tanganing mailuto kan mga chef sa hotel na dadagosan. Malanit na siguro an tulak y agis-ison na an mga ini sa pakaon-kaon nin sardinas na prinito, kinusido, pinaksiw, o tinoktok duman sa Tabaco, maherak man kamo.

An mga mangaipo nin kaubay, puedeng ipalaog an mga taga-Calle Mabole sa TUPAD #BKBK kan DOLE ta an mga ini no-work, no-pay man baga. Makatao ka na nin trabaho, makapaogma ka pa kan pigapakulong mo, he! he! he!

*****

Igua na palan nin diit na karibokan sa Emergency Operations Center (EOC) manongod sa pagpalaog nin mga tawo sa isla.

Bago pa ini nangyari, dati nang binuaaw kan dyaryong ini an pagviaje nin magcapirang pulis, Coast Guard y Army halos cada semana papuntang ibong y pabalik na dae gaagui sa 14-day quarantine. Dae man daa sindang helang, sabi ninda y kan saendang mga amo, minsan pa nagdadacul na an mga kaso nin confirmed COVID-19 sa Albay y CamSur.

Alagad bako man saa gabos pinalaog, ta igua ngani daang pinasakay otro sa lantsa pabalik sa mainland.

Kan mag-abot daa an 34 na stranded hare sa Tabaco, igua daa itong kaibang taga-DSWD regional office. Dae man siya pig-quarantine y naheling pa nganing naglalakaw-lakaw diyan sa capitolyo.

Sinundan daa ini kan pag-abot nin sarong vehiculo hareng Maynilang kayganda, sakay an duwang doctor y pigamanejo nin saro daang seaman na nagpanggap na driver.

Imbes na pig-quarantine, pinaparibod daa sinda sa saendang mga harong, tanganing duman magparipas nin catorce dias.

Ngonian, maculog daa an daghan kan mga gabantay sa pier nin Virac y San Andres ta an mga nakasabot daa kan ley y quarantine guidelines, iyo pa an minabalga caini. Mayad pa daa an kasaradayan ta sige sana an sunod, minsan demanding, he! he! he!

An hapot kan mga reclamador, aanhon pa an protocol kung dae man sana nasunod, lalo na kung mga poderoso y midbid nin poderoso an mga galaog sa isla?

An duwang doctor y an driver ninda basta na sana nagpa-isla, daeng naenot na pasabot sa PDRRMO minsan aprobado daa nin DOH an travel caini ta Authorized Person Outside Residence (APOR) an mga ini.

An punto man kan mga bantay, an APOR puede sana magribot sa sarong municipio o provincial, ta iba man dapat an patakaran para sa mga APOR na mabaryo nin dagat, lalo na kung hari sa mga lugar na iguang COVID-19 arog sa ibong o Maynilang kayganda, maski pa sinda frontliner.

Cotana daa ipaagui man siyempre sa 14-day quarantine an mga APOR na nagviaje hare sa mga epicenter kan COVID-19.

Ta kung dae ini masusunod y an kapritso nin mga poderoso an mangibabaw, daeng halaga an barantay sa mga pier, baybayon asin checkpoint, pwe!

Leave a Reply

This site uses Akismet to reduce spam. Learn how your comment data is processed.

%d bloggers like this: