qui Tang Tacio
Sitenta mil palan daang kaakian an dae nakabasa sa enterong Bicol, ini segun sa pag-aadal mismo kan DepEd.
An cadaclan daa nasa Grade 1 asin 2, y an diez y ocho mil nasa Grade 3 hanggan 6.
Kung pira man dindi an nasa Islang Maogma, dae man sinabi sa bareta kan DepEd Bicol.
Dae pa ngani natapos an aldaw, nagreclamo na an amo kan DepEd na si Leonor Briones. Insulto daa an bareta sa mga Bicolano ta bako man sabihon dae nakabasa, illiterate na.
Iguang punto an amo nin DepEd na iba-iba man an lebel kan reading asin comprehension sa Ingles asin Filipino.
An kamumundo sa bagay na ini iyo na talagang dakul na an mga aqui na batid man cotana magbasa alagad masakit makasabot. Madarakula man an mga ini, sige sana an boto sa mga daeng camogtacan na mga candidato basta iguang paikim, he! he! he!
*****
Problema na palan ni alcalde Posoy an basura sa Virac.
Segun sa osipon, sinabihan na daa kan DENR an municipio na paserahan na an dumpsite sa Casoocan.
Dati na daa ining sineraduhan kan panahon ni alcalde Samuel y binabawan na ngani nin dugui tanganing matanoman nin gabon. Alagad pagsalida nin administrasyon, duman na naman tinambak an mga basura y bako duman sa kataning na daga na para cotana sa sanitary landfill.
Saro pa daa, kan nacaaguing administrasyon, duwang equipaje an nakadestino sa Casoocan para mamantenir ini alagad hinari paka-eleksyon. Pagsadiri palan nin politico, bako ning gobyerno, he! he! he!
*****
Sabi kan mga pasahero sa lantsa na papuntang Islang Maogma, dae man daang health screening sa pier duman sa Tabaco.
Saro man sana an gustong sabihon caini: daeng pakialam an Tabaco o an Albay kung paluwas na an pasahero, minsan igua pa ining Covid-19. An importante sa saenda, daeng makalaog na iguang Wuhan virua sa saendang lugar.
An mangyari caini, an mga tripulante kan mga ferry boat iyo an isyuhan ning infrared thermometer y idungdong sa angog kan gabos na pasahero, pati na an mga drayber y pahinante nin mga trak.
Kung gusto makasiguro kan EREID task force, sinda na sana an magpadara nin tawo sa Tabaco tanganing maggibo caini bago pa man makasakay sa lantsa an pasahero. Harimbawang makanagbo nin calenturadong sip-onon, dae na pasakayon o kung harimbawang aduman na sa lantsa dae na pababaon sa Calolbon o Virac. Iribod sa ibong o sa Maynilang kayganda tanganing sinda man an mamroblema, he! he! he!
*****
Igua palan ngonian nin bag-ong modus an mga daeng cuartang holdaper.
Kan nacaaguing semana, igua daang tawo na tinagbo nin duwang lalaki, an saro joven pa, asin sinabihan na igua siyang atraso sa saenda.
Iguang bitbit na kutsilyo an lalaki, na nagsabing magbayad an victima.
Mayad nganing dae man nawara sa isip an victima, dagos nagdalagan padulag hanggan makaabot sa bukas pang tea house kataning nin Bazaar. Kan maheling na iguang tawo sa laog y igua pang CCTV, dae na nagdagos.
Sa panahon na ini nin mga mall, igua pa man guiraray nin gatirios caya pinag-iingat an gabos tanganing makalikay sa disgrasya.
*****
Segun sa sarong eksperto sa Centers for Disease Control (CDC) sa Estados Unidos, posible daang an Covid-19 dae mapugulan na maglacop sa enterong kinaban, minsan pa iguang maimbentong bakuna laban sa helang.
Magigi daa ining community disease arog kan TB, tipdas asin iba pa. Entonces, pasensya na sana an mga tatamaan kung maluya an saendang ginhawa.
Magayon na ipasunod giraray kan gobyerno an pagtanom nin gulay sa mga solar kan cada harong, siring sa itinaong kondisyon sa mga 4Ps tanganing makakua nin benepisyo.
An magiging problema na sana, kung pano pipiliton kan mga magurang an mga aqui na magkaon nin gulay, lalo na ta tood na sa burger, pizza, y chicken joy…