Nag-abot na palan an mga wing van na binakal kan Capitolyo para ipanaltag sa onceng municipio.
An pacahona kan cadaclan an maabot na mga van kapareho kan mga gaviaje pa-Manila na gamit kan mga namakal nin gulayon.
Bako man palan na haralaba siring kan mga naenot na mga litrato caini na pinaluwas.
Saraday man sana palan y halos doblehon sana an L300.
Caya an mga namroblema kung aanohon ini kan mga municipio kung dae man nin hahakoton na relief lalo na ta El Niño, daeng bagyo, cadacul sanang puedeng gamitan caini.
Enot, puede na ining panghakot nin mga gulayon na produkto nin harayong barangay para ipabakal sa población.
Icaduwa, kung igua pang espasyo, puede pang dagdagan nin mga dos por dos o dos port res hari sa mga paraputol nin kahoy sa bukid, basta ciertong dae madakop, he! he! he!
Icatolo, kung magbakal si alcalde nin saday sanang sound system na may generator, puede na ining ibyahe sa mga barangay tanganing dae na magparasolicit nin cuarta Saiya para sa mga funcion.
Harimbawang habo an mga nanunungdan na gibohon ini y kung panahon sana nin calamidad iluwas, mas magayon na gibohon an mga ini nin masarig na garahe, lalo na sa lugar na harayo sa dagat, tanganing dae dagos malapa.
*****
Halos uru-aldaw man an buros nin uran, caya bugawas an tubig sa mga posit sa banwaan nin Virac na pigasuplayan kan VIWAD.
Galaog na kaya an amihan caya gadara ini nin kalat-kalat na uran sa Isla Maogma.
Alagad dae pa man tapos an dugang na panahon, ta an mga saraday nganing sapa, dae o diit pa sana an tubig.
Inda ko sana kung pinadagos pa kan manejamiento ni manedyer Abuab an aldawan na pagpamibi para sa regaling tubig hari sa kalangitan.
Cotana, maghingoha an manejamiento pati na an local na gobyerno na makahanap nin fondo, lalo na sa gobyerno nacional pati na sa duwang congresistang elegido (dae kabali an nacatindog), para sa pagpatogdok nin dam sa itaas kan Cauayan na cayang susteniran an pangangaipo sa tubig nin banwaan sa laog nin tolong bulan.
Panahon nang bawasan na ngona an fondo nin flood control y patinampo. Mas importanteng solusyonan an paha kaysa baha.
*****
Nagbukas na palan an branch kan Chinabank diyan sa VTC 3, kasabay an inagurasyon man kan Mr. DIY sa icaduwang Escalon,
Sabi ni Bos Te, dae pa daa nahaman an lugar kan Chow King, tibaad sa katapusan pa nin bulan o caya Noviembre caya maghalat-halat ngona an gatiam-tiam sa halo-halo.
Igua pa daang duwang tindahan na mabukas ngonian na a-quince y an grand opening gigibohon sa dae pa nadeterminaran na fecha sa Noviembre.
Otsenta porciento na daa kan mga stalls sa VTC 3 an reservado sa mga negocio, kaiba an Hap Chan Chinese restaurant, Power Mac Apple store, Penshoppe asin iba pa.
*****
Inako kan PSA na bako man kumpleto an basehan kan 0.3% na economic performance kan Isla Maogma.
Ini dahelan sa saro man sanang bagay: an datos na cotana basehan kan pag-aadal bako man gabos natao kan impormasyon na hinagad kan PSA.
Sa saro sana daang sektor, limang agencia o tawong maresponde an dae nagsumitir nin datos.
Saro pa, sa construction sector, bako man gabos na mga gaoatodgok o gapasarig nin harong gakua nin building permit sa local na gobyerno, na an mga personaje dae man gahingoha na mahiling an gabos na patrabaho lalo na sa hararayong barangay.
Sa pagsire, an mga dali sa lawod nin taga-isla na pigadara sa ibong, dae man cabali sa cuentada, caya kulang man an datos.