Sarong ciudadano an naghapot kung ngayta nahiling niya an daraculang apat na letrang PATA sa kudal kan Campo Camacho.
Segun sa nakasurat, an gustong sabihon daa caini Public support, Accountability, Transparency asin Alignment, na iyo daa an susundon kan presenteng lideratro kan kapulisan sa Isla Maogma sa pangengenotan ni Col. Buena.
Sa paggilomdom daa kan ciudadano, an dating nakakahang dindi ERC, na inisyal kan dating comandante nin mga pulis bago ini nagretiro dae pa sana naawat.
Dae man nareparo kan nakabasa na an PATA inisyal kan satong gobernador, Patrick Alain Tejero Azanza.
Caya magmaan an mga kalaban kan daculang tawo sa Capitolyo, ta bakong VRB an susundon na programa kan kapulisan kundi an pata, he! he! he!
Maawat siguro ini sa puesto, lalo na ta aqui pa daa an bag-ong amo, tibaad pagraduaron an satong gobernador…
*****
Nadakop daa nin mga personahe nin ENRO an sarong dumptruck na may kargang mga daraculang bato kan nacaaguing semana.
Dae daang inaapod na Ore Transport Permit na dara an drayber caini.
Igua man cotanang bitbit na transport clearance na nakapangaran sa sarong Realubit ta taga-ibong alagad nagnegar daa an tawo na siya nagtaong permiso.
Sabi pa, an rehistro daa kan vehiculo nakapangaran sa J.C. Cua Construction & Supply alagad an nakadukot na sticker sa trak GCI Construction.
Soboot, an mga bato igamit sa breakwater sa Palnab diyan sa Virac na proyecto kan GCI.
An manejamiento daa kan contratista nagsabi na awat na nindang nabakal an 10-wheeler na trak sa dating kagsadiri.
Kung ano an mangyari sa kasong ini, halaton ta na sana….
*****
Igua na palan nin nakabakal sa Amenia beach resort duman sa Palawig.
Halangkaw daa an katungdan kan buyer kan resort na awat nang pigapabakal kan familia Panti ta dae nang mamanejo caini.
Segun sa chismoso, veinte siete milyones pesos daa an bayad, cash caya makaskas, y an kinahang sa deed of sale trese milyones pesos sana.
Dae man sigurong problema kung aanohon kan nagpabakal an imo, lalo na ta igua man nin mabaranga.
An reparo nin sarong pilyong marigmat an mata, yata dacul pa an tada sa caban kan daculang tawong nakabakal caini, lalo na ta binakal pa sana daa caini an saro man na saday na beach resort diyan sa Mamangal sa Virac, he! he! he!
*****
Tibaad daa ngonian na semana tapos na krisis sa Corriente.
Magiging regalo daa ini kan administrasyon ni PBBM sa mga taga-Isla Maogma ngonian na Independence Day.
Bilang pagsunod sa orden kan DOE, nagpa-bidding palan an Napocor nin dagdag na 5 megawatts na suplay gamit an diesel genset y an nanggana an companya ni dating Cong. Hector, na ginamit iyo an anom na genset na inarquilahan kan SUWECO.
Caya, buhay naman si Manoy Hec, helingon ta daw kung masusteniran an operasyon kan power plant niya sa laog kan Napocor sa Marinawa…
****
Duwang sunod na plunder case an sinang-at ni Gob Azanza laban qui Boboy y Bos Te Cua pati mga miembros kan BAC asin finance committee kan Capitolyo.
Ini daa manongod sa pagsuplay nin krudo y gasolina sa gobyerno provincial kan Virac Gasoline Station na sabi kan halangkaw na opisyal dummy man sana kan Powerzone na pagsadiri kan familia na kalaban niyang mortal.
An saro iyo itong sa tinaong tabang sa Capitolyo matapos an bagyong Pepito na soboot dae daa na-liquidate nin patanos.
Caya tibaad sa mga masunod na bulan o semana, igua naman sigurong masuspindeng mga opisyal kan Capitolyo.
Baguing dae na matapos an karasohan sa Isla Maogma, bagay na nakapagamo sa mga naipit sa duwang campo.
Sato sanang ipagdasal na gabos na personajeng invuelto sa caribocan na ini, na dae mag-abot an panahon na maubusan na sinda nin bagay na ikakaso.
Tawan man lugod sinda nin
toninong na isip, mahuyong boot y capasidad na magpatawad, awot pa….