Nagpoon na palan mangampanya si Papa Leo, ay sala, Cong Yoloyo, lalo na sa mga piyestahan sa Isla Maogma.
Sige na daang panao nin cuarta sa mga barangay na nangimbitar sa baylehan, cabale na an mga jovenes na pigahobonan nan in bolang pambasketbol.
Mayad ini, tanganing mabawasan man nin diit an mga deligencias posibles sa mga contrata sa DPWH, sabi nin sarong contratista, he! he! he!
Caipuhan magpahamot kan amo sa Batalay House of Representatives lalo na ta sige na an pamati kan saiyang magiging kalaban sa 2028.
Dae pa sana daa naawat, nagreclamo na daa an gatocaw na congresista sa regional director nin DOLE ta dae na daa siya piga-imbitaran sa mga taraltagan y ibang programs kan departamento, lalo na sa TUPAD asin iba pa.
An pirmi na sana daang presente sa mga programang ini, lalo na sa taraltagan, iyo an gobernadora na dae man nanayuma sa mga arog kaan na okasyon, he! he! he! Ventaje sana na iguang pirming ikahang sa Facebook, he! he! he!
Lalo pa ining seselosan kan duwang representanteng taga-Batalay, ta segun sa osipon, an fondo nin TUPAD na maabot daang labing dos cientos milyones pesos directa nang itao sa govierno provincial.
Entonces si gobernadora an makapot kan fondo y posibleng siya man an malista kan mga recipientes, he! he! he!
Siguradong ipaheling caini na daeng peke na benepisyaryo an makabale sa listahan, bakong arog kan ayuda sa mga tricycle driver na sa Virac sana ciento cuarenta y siete an bako man daang qualificado magrecibe nin tig-cinco mil pesos.
Sa bagay na ini, an hapot kan mga dae nacabale sa listahan, ano an gigibohon kan municipio o kan DOLE sa mga nakakua nin cuartang bako dapat para sainda?
Guiromdomon tabi na an cinco mil awat nang dinuhay, sinuka sa inuman o pinadaog sa tupada o paykyuhan, pwe!
*****
Segun sa mga viajeros pa-Norte y an mga gavisita sa mga barangay sa bolod, dugang na an mga sapa o salog na saendang naaguihan, senyal na bako nang dry spell an namati sa Isla Maogma Kundi drought o tagtuyot.
Masque ngani daa mga bombahan, kung bakong masakit nang gamiton, dae nang galuwas na tubig.
An mga iguang imo dae mapaha, ta madari sana magbakal nin mineral water sa mga refilling station o sa tindahan.
An masakit an buhay iyo an mga pobre, na lalong madagdagan an gastoson sa pang-oro-aldaw na pangangaipo, lalo na sa pagcaon.
Caya bako sanang pagtipid sa tubig o Corriente kundi pati an pagbawas nin bisyo, lalo na sigarilyo o agua de pataranta, tanganing iguang pambakal nin tubig asin pagcaon.
Dae ta na paghalaton na mag-abot an panahon na dae na kita makacarigos ta dae nang gailig sa posit.
Bako man kitang mga Amerikano o taga-Europe na nakatios nin pilang aldaw na dae nangarigos.
Puede man punas-punas na sana, pupugaan sana an labacara pacatapos pahidon an sabon, he! he! he!
Ultimamente, caipuhan tang sunodon an aviso ni manedyer Abuab na magpamibi tanganing darhan kita nin dacul na uran.
Puede na sigurong pun-an ngonian an Oratio Imperata sa mga simbahan y capilya tanganing iguang umaguing barong-barong o maluyang bagyo.
Gibohon na parapoon an mga politico, ta sinda an makinabang sa ayuda….