Dae pang anuncio an Capitolyo kung noarin matapos ang pagvisita nin ENRO asin PNP sa mga quarry permittee base sa orden ni Gob Pat.
Tibaad susukulon pa an cada tambak nin graba asin baybay para masiguro kung tama an volume base sa declaradong stock kan permittee.
Kung siring, maawat pa ini y posibleng maglampas pa sa treinta dias na palugit sa orden na nagsuspinde ning quarry operation sa enterong provincia.
Afuera sa mga saraday na para-serni nin baybay asin graba, afectado man an mga ordinaryong tawong gapatrabaho kan saendang mga harong.
Ngata? Minsan dae sinabi sa Executive Order, pigaimponer daa kan ENRO na bawal magpabakal an mga dealer nin graba asin baybay.
Caya daa an mga desperado nang magpadagos nin patrabaho sa harong, lalo na itong problemado sa trabahador, gapapaos nin panghagad sa kanatad o caya kamidbid na iguang sobra na dae nagamit.
An iba ngani, nangua na sana nin graba sa gilid nin tinampo, sa kanal asin iba pang lugar na bako man quarry site, basta iguang permiso nin capitan.
Puede man cotanang tugotan na an mga permittee asin mga dealer na magpabakal pakatapos na mainspeksyon an mga stock caini tanganing daeng abara sa mga nangangaipo.
*****
Tanganing matawan nin leksyon an mga drayber sa traysikel na magatol an kamot, maati an isip y matagas an icatolong bitis, marinas na an satong mga tugang na babayi magdara nin cutter o caya pepper spray sa cada viaje ninda sa luwas nin harong.
An cutter nababakal sana nin hababa sa cincuenta pesos cada saro y an pepper spray dae ngani sanggatos sa online.
Sa panahon ngonian na dacul na an mga adik bako sana sa droga kundi sa sugal y mga kabagraan sa selpon, siguradohon na igua kamong panlaban sa mga ini lalo na kung solong pasahero sa tricycle o galakaw sa lugar na daeng katawotawo.
*****
Magcapira palan na mga parataya sa peryahan an dinakop kan Virac police station diyan sa Calatagan.
Ini daa nangyari minsan igua daang pinaheling an operator nin permit na pirmado ni alcalde Posoy.
Binitbit daa sa istasyon an mga ini, lalaki man o babayi, hinapit sa EBMC para maeksamin y pigdetine sa istasyon nin anom na oras.
Alas dos na daa nakaparibod an mga tawong gaparipas man sana nin oras sa peryahan y gataya nin sinsilyo sa mga pakawat.
Posibleng an gustong sabihon peke an pirma ni alcalde o caya tunay alagad dae man nin magcacanigong permit sa pulis.
An permit pa naman sa mga sugal duwang klase: an naheling barato sana alagad an dae naheling sobrang triple an cantidad, oro-aldaw pa an bayad, he! he! he!
Saarin man daw sasalakayon kan mga autoridad an mga pribadong pasugalan na mananggatos hanggan manangribo na an pusta?
An sigurado ko na dae madadakop an sugal na kada tolong taon ginigibo, an pusta gaabot nin sobrang dose cientos milyones pesos cada saro, y an premyo permisong manghabas sa caban nin gobyerno sa laog nin tolong taon.
*****
Dae na masabotan kung ano an nasa utak kan tolong komisyoner nin COMELEC First Division.
Sa laog nin tolong bulan, dinesisyunan ninda an duwang kasong diskwalipikasyon laban sa magtugang na Boboy y Boste Cua.
Kan Abril, binasura an petisyon ni Azanza, ta iguang magcacanigong evidencia na Pilipino si Peter Cua. Alagad pakatapos nin tolong bulan, an duwa sa tolong komisyoner nagpabor sa petisyon ni alcalde Posoy na Intsik daa si Joseph Cua.
Pareho an evidencia, pareho an argumento, pareho an tolong komisyoner, ngata ta iba-iba ang desisyon?
Iguang nakapa-bago kan saendang mga isip?