Ipadagos ta an pagdiskutir kan pinaluwas kan COMELEC manongod sa vote-buying.
Ikaduwa, bawal an mag-ofrecir o manuga nin bagay na iguang halaga katukal nin voto.
Iyo siguro ini an dahelan kun ngata an oficina ni Cong Yoloyo nagpaskil nin karatula na bawal mag-solicit an publico (cabale an mga macuapo ni Nestor) diyan sa tampad kan ARDCI, he! he! he!
Alisto man Talaga mag-interpretar nin ley an bagitong congresista, minsan ngani gaparanganga man sana sa sesyon sabi kan saiyang kalaban, he! he! he!
Caya kamong mga votante dae ngona maglani sa mga candidato ta bawal, segun qui Cong Yoloyo ta iyo man sana, kung kamo marecibe kan tabang na hagad niyo, sasabihan kamo kan maduhor na dae pagringwan an nagtao sa maabot na Mayo dose.
Icatolo, cierto daang vote-buying kung makaheling kan nin halabang pila nin mga rehistradong votante o mga ordinaryong tawo sa panaltag nin cuarta, health o insurance cards, groceria asin iba pang mahalagang bagay na an intension kumbinsihon an gapila na iboto o dae an sarong candidato.
Ini patanid sa mga nanartag na nunca magpapila pag-abot kan oras de peligro. Magkanap sana tabi sa kabanggihon asin saro-saroon kabisitiha an mga tatawan nin paomok, he! he! he!
Sinasabihan man an mga candidato, honorable man o bako, na dae mag-house-to-house na iguang bitbit na panartag, imo man o mahalagang bagay.
Sabot na kan mga votante na iguang maabot na grasya pirang aldaw bago an eleksyon, minsan kiyat sana kan candidato o saiyang ward lider puede na, he! he! he!
Ikaapat, bawal an mga pa-bingo, pakawat asin iba pa kung manartag man sana nin premyo an candidato o saiyang mga alipores, lalo na kung an pirming naanunsiyo an pangaran niya o nasa backdrop an pandok kan candidato,
Puede siguro magpataya na sana sa ending o lotting, libre an pagtaya pero an mabayad kan ginana an candidato, he! he! he!
Saro pa, bawal na man an paghakot nin mga votante sa aldaw nin eleksyon y mas lalo man daang dududahan nin COMELEC kung magtiripon an duwa o sobra pang tawo sa sarong lugar sa siring na oras.
Tapos caini an mga gabarantay sa tinampo nin maaga sa maabot na grasya, he! he! he! Kung puede, duman sana tabi sa trangkahan kan harong ta baad iapon na sana kan maaguing anghel an mejoras, he! he! he!
Ikaanom, dadakupon an sisay man na gadara nin cuarta na sobrang cabangan milyon na pesoses, masqui pa dolyar, kasabay an mga polyetos, tarpaulin o iba pang gamit pangampanya duwang aldaw bago mag-eleksyon asin sa mismong aldaw nin borotohan.
Caya magbitbit sana nin P499,999.00, cabale na an laog kan pitaka y sinsilyo sa bolsa, tanganing dae dakupon sa checkpoint.
Naguiromdoman ko lugod an nangyari kan mga nacaaguing eleksyon: iguang pinarang mga carruaje sa checkpoint y naheling na iguang laog na kinahon na imo. Nakadulag daa an drayber y pag-iriba, hinubon an kinahon na milyones. Dae na daa nakaabot sa Campo Camacho an kahon, he! he! he! Kung igua man, dakula na an bawas, pangkape sa Calle Mabole, he! he! he!
*****
Pareho palan na kinasuhan kan saendang mga kalaban sinda Gob Boboy Cua y Bise Gob Boste Cua.
Atang parehong law office an nagkapot kan duwang petition for disqualification sa Comelec, pareho man an rason: mga Intsik daa an magtugang y dae puedeng magkandidato.
Kan 2013, minsan nadaog ni Siliwong an gobernador, ginana caini an kaparehong kaso sa Comelec na nagsabing sobra-sobra an evidenciang prinisentar na nagpatunay na si Boboy Cua sarong naturalized Filipino y bakong Intsik.
Tibaad ngani mas tunay na taga-Isla Maogma an magtugang na Cua kung bibilangon an mga aldaw na sinda uya sa provincia kaysa mga nagkaso sainda.
Halaton ta na sana an desisyon kan Comelec sa kambal na petition na ini.