minalawod sa de-10 caballos nyang sakayan
tolo sagcod anom na oras bago abton
ang paborito nyang bahura.
solo sya sa saday nyang de-katig
sa tahaw kang mahiwas na kadagatan;
duyan-duyan ning kadlacurang alpadura.
ang takot, ang ripot daog ning pagtubod.
lambang hurog ning banwit
sa larum na 30-75ng dupa
kaiba ang udok sa pusong dasal
na mapaogma ang sainyang familia.
kung daing gasubad sa napundohan, paiwas
sagcod mamate ang mayad na pagpamugtak.
isi nya kong anong sila ang nag subad
sa klase ning titi o cusog ning hugot:
calapion, tangingui, baraka, mangagat,
mangiba-iba ang saindang kawat.
kinaagahan pagparibod, guyod ang hun-oy;
tibaad lamang makabaton ning durado,
manabang, o kung masuerte, malasugui.
bihira na syang makaguda ngonian.
kadaklan, kadiit kang sainyang dali;
nugayod dai nabawian ang pang-gasolina.
pero pag-abot ning hapon, buelta sa lawod,
oro-otro, daing hidap nyang hahanapon
ang riwanag kang sainyang paglaom
sa kamayngan kang dagat na madulum.