Narugado an satong mga politico, gatocaw man o bako, sa sunod-sunod na Christmas party nin barangay, TODA, mga oficina, asin manlaenlaen na grupo sa enterong provincia.
Grabe na daa an agrangay nin magcaperang mga elegido, sa paburobutbot nin imo sa bolsa, he! he! he!
Kung bakong panghanda o pang-inom sa party, pang-raffle na premyo ang hanap.
An saro daang ambisyosong magin congresista, an pinanartag oganing asistensya nin gobyerno para sa mga tricycle driver na pinaagui sa sarong senador, caya ngani gapapirma sa mga recipients saro-saro
An problema daa, baguing bakong parareho an itinaong tabang. An gustong sabihon, binarangabanga an fondo y bako nang tama an resibihon na cuarta.
Kung pano ini aayuson kang ma-liquidate kan fondo, bahala na man sinda.
Mayad pa daa an gatindog na congresista ta dae nasolicitan, pirming wara o kung adyan man dae makalaog an mga parasolicit sa halangkaw na kudal, he! he! he!
*****
Puede na palan daa maggamit nin anuman na bado an mga transgender na empleyado nin gobyerno.
An gustong sabihon, an mga babayeng an pagmate lalaki sinda puede nang magsul-ot nin barong y pantalon mantang an mga lalaking an hiwas sa babaye puede na maggamit nin palda, blusa o anuman na gusto ninda basta base sa uniporme kan oficina.
Dapat sana sigurong iclaro kan mga nanunungdan na an mga lalaking mapalda dapat iguang pang-irarom na short ta tibaad magturutabyon an dae dapat maheling, he! he! he!
*****
Pati palan bonyag ngonian nangaipo na nin event coordinator. Iyo daa ini an trend sa maogmang isla.
Caya magpoon sa harong habang pigakarigos an omboy hanggan sa pagbado, nakabidyo na.
Adyan man an camera sa pagsakay caini sa awto, pag-abot sa simbahan hanggan basbasan kan padi.
Ngonian, pag-abot sa reception, igua man nin introduction an mga ninong y ninang, susundan kan pagpaso nin magurang, tulak-tulak an engrandeng stroller na iguang decorasyon.
Ini sa mga iguang imo sana tabi, dae pag-arugon lalo na kung dae ka man sana nin cincuenta sagcod sanggatos mil na pambayad sa video coverage, idagdag pa an handa pati inom.
Mga pilang taon pa an maagui, mangaipo na man nin event coordinator sa pamalaye, engagement party, pati siguro sa primerong ubayan, he! he! he!
*****
Ngonian na pira nang biyahe nin eroplano an dae nakalanding o caya kanselado dahil sa uran o madurom na kalangitan, naguilomdoman kan magcapira an dae nangyayaring panuga para diyan sa Virac airport.
Cotana kan panahon ni ex-Cong Saryo, nafondohan na an runway lighting sa aeropuerto habang siya gatocaw bilang chairman kan House Committee on Transportation. Dae nangyari.
Pagtocaw ni ex-Cong Hector, dae man nin nangyari, ni dae man yata caini pinaabot sa DOTC o CAAP an pangaipo kan Isla Maogma pag-abot sa air transportation. Wara-wara man caya, paburobago pa nin isip.
Adyan na man cotana si Cong Yoloyo, alagad gaparnganga man sana da aini sa mga sesyon, an hanap sana fondo para sa mga proyecto sa DPWH, lalo na mga flood control o seawall na gakahalaga nin labing sanggatos milyones pesos an cada saro.
Dae pa sana naawat, nagpa-bidding an CAAP nin P56 million na proyecto para Instrument Landing System (ILS) nsa Iloilo International Airport asin P10 million na proyecto para runway edge lights ning General Santos Airport.
An suma total, P66 million, dae pa ngani tercio kan halaga nin sarong section kan Imelda boulevard diyan sa San Vicente.
Sa P66 million na ini, makalanding na an mga eroplano kung banggui, gauran o madurom an kalangitan.
Bag-ong congresista siguro an caipuhan caini….