Navictima nin salang pag-isip sa politica an ginibong pag-ondra sa naka-top 10 na nursing graduate nin CatSU dae pa sana naawat.
Siring sa dating gawe, inimbitaran daa kan comitiva an alcalde nin Virac sa okasyon tanganing magtao man nin pataratara bilang ama nin banwaan, malang taga-Valencia an topnotcher.
Alagad nagduwa-duwa daa an OIC na taga-CHED Region V, nagsabi daang bawal an politico sa seremonya.
Iyo ini an osipon na pinaabot kan comitiva qui Samuel Laynes, an candidato bilang congresista, caya nagdesisyon an alcalde na dae na sana mag-aparecer sa okasyon tanganing maging toninong an salang kaisipan ni Dr. Septon.
Kung ano an naglaog sa payo kan OIC hari sa hinghing ning kung sisay na tawo o politico, bahala na kamo maghorop-horop.
Manipis man palan an panit ni Septon, madari mapaso sa dangdang nin calayo nin politica. Imbes tawan nin paggalang an posisyon ni Samuel bilang alcalde nin Virac, an dinuonan niya iyo an pagiging candidato caini sa maabot na eleksyon, minsan bako pa man panahon nin campanya.
An gusto sigurong sabihon, magbitbit man nin cien mil an alcalde sa pag-omaw sa topnotcher siring kan ginibo nin politicong amigo ni Septon, bako sanang ngalabngalab.
Cotana, maghagad siya nin dispensa bako sana sa alcalde kundi sa enterong banwaan nin Virac sa saiyang ginibo….
*****
Igua na naman palan nin sinipa an banal na district engineer diyan sa DPWH.
Dagdag daa sa trabaho caini sa dating opisina, sinabod daa ni DE Simon an sarong ingeniero sa Quality Control ta soboot dacul an gibohon duman. Sinabay pa an duwa pang ingeniero para dae halata na siya sana an pigapatamaan, he! he! he!
An kinawatan na ingeniero miembro daa nin BAC na segun sa mga chismosong empleyado igua daang pigaluto na bidding kan nacaagui pang semana.
An dangog-dangog sa laog, pati daa an kusinerong mayor nailoy sa pigalutong putahe ta dinagdagan daa nin ingredienteng tinao kan tunay na amo nin DPWH, an gatindog na congressman kan Isla Maogma.
Dinara na daa sa arbularyo an pinangluyang kusinero pero an saro o duwa daang miembro nin BAC dae naafectaran ta makunit na daa an mga tulak caini, dae na nagtalab an nakailoy na panghalo na kinua pa sa Batalay, he! he! he!
Kung ano an resulta sa kaso nin food poisoning sa San Isidro Village, dae pang nakaisi.
Kung makamate pa daa nin sintomas an gabos na miembros nin BAC pati an santong amo, habo man daa ini magsolo an banal sa ospital ta dapat kaibahan an gabos, he! he! he!
*****
Dae man palan nagamit an tolong evacuation center sa Caramoran, Viga y San Andres kan nacaaguing bagyong Pepito.
Segun sa mga awtoridad, dae man daa puedeng ocuparon an mga nasabing edificio na tinogdoc kan DPWH regional office ta an disenyo daa caini bakong para sa bagyo kundi sa pagtuga nin bulkan.
Sim an atop na puedeng tarbohon nin makusog na hangin, bako pang sarado an edificio ta an cadaculaan na gilid bako man na sarado.
An nasa Caramoran ngani daa, pigagamit na sanang venue nin municipio asin kataraning na barangay sa barayle asin iba pang okasyon.
Kung sisay man sa DPWH regional office an nakaisip caining ideya na kopyahon an mga evacuation center sa Albay y ipatogdoc sa Isla Maogma, deligencia sana nin sadiri y contratista an nasa arimantak.
Ciertong dae man ini kinonsulta sa mga LGU ta kung iyo, iba cotana an kinaluwasan.
Mayad pa sa Virac na nagibo ni alcalde Laynes na ipabago an disenyo kan duwang evacuation center, an sim na atop tinucalan nin matibay na konkreto…