Grabe daa palan an caogmahan kan campo nin gatocaw na congresista kan magluwas an survey kan RP Mission and Development Foundation, Inc. o RPMD manongod sa performance kan mga congresista sa rehiyon Bicol.
Nasungkit daa ni Yoloyo an pang-onceng puesto sa top performing representatives nin Bicol sa survey na ginibo kan Hulyo 1-10, 2024.
Guiromdomon tabi na disisais an representante sa Congreso kan rehiyon: lima sa CamSur, tolo sa Albay, tolo sa Masbate, duwa sa CamNorte, duwa sa Sorsogon, asin saro sa Isla Maogma.
Ngonian kung hehelingon an resulta kan RPMD survey, statistical tie si LRay Villafuerte (89.6%) y Joey Salceda (89.5%). Iyo man sinda Fernando Cabredo (87.1%) y Edcel Lagman (86.9%).
Caya kung bibilangon mo an ranggo kan satong representante sa Congreso base sa grading nakua, pang catorce an satong gatocaw na congresista sa grading 74.1%.
Duwa sana an dinaog niya, si Wilton Kho kan Masbate 3rd District (72.3%) asin Rosemarie Panotes kan CamNorte 2nd District (70.5%).
Kan sarong taon, sa RPMD survey na giniboa kan June 25-July 5, 2023, numero uno si Salceda (91.6%), asin kapurit an satong Cong Yoloyo na may grading 67.7%.
Caya saboton tabi kung nga grabe an caogmahan kan Batalay House of Representatives na nakaidos man nin duwa pang ranggo an saendang bida.
Tibaad magpabayle ini ta naghalangkaw man an grado, pero dai pa ngani inabot an passing grade na 75% sa elementarya, he! he! he!
Kung sa colegio ini, duwang semestre nang bugok, kick-out na dagos, he! he! he!
*****
Pareho palan na nag-atender sa pabertdey ni dating alcalde Posoy an duwang candidatong congresista.
Aduman daa si Cong Yoloyo asin an saiyang esposa, nag-abot man an mag-amang PBM Jan Alberto y an saiyang ama na si dating alcalde Cito.
Nagsayaw pa ngani daa an mag-agom na representante kan Batalay House of Representatives habang gakanta an bocal na taga-Palta na candidatong independiente para congresista laban qui Yoloyo, alcalde Sammy Laynes y Cedric Sanchez.
Dae man siguro inimbitaran an bocal para magharana sa iguang compleanyo y mga visita, ta kung iyo, posibleng mahal-mahal an bayad caini, he! he! he!
Kung ano an basa caini kan mga votante, bahala na sinda. Dae ta isi kung ano an hororon kan mga Alberto, Sarmiento y Rodriguez, kung tunay na magkalaban o sagin-sagin sana para mag-iribahan sa huring aldaw, he! he! he!
*****
Igua pang halos anom na bulan bago magpoon an cuarenta y cincong aldaw na campaign period kan mga candidato para gobernadora, bise gobernador, bocal, congresista, alcalde, bise alcalde, y consejal.
Mantang sige an ribot ninda sa pagpamidbid sa banwaan habang bako pa sindang opisyal na candidato, dae dapat pagringwan na sa panahon n aini, dapat nang magtipon nin pambubod na cincuenta, sanggatos, dos cientos, quinientos y sanribo.
Ining avisong ini para sana duman sa dae pang tagama sa ultimo ora ta itong mga dati nang hararom an bolsa, mapasinsilyo na sana sa bangko.
Ngonian, an enot na gigibohon iyo na listahon ngona an mga pagrogaring, mga daga, harong, uma, ataman na karbaw o orig, carruaje magpoon duwa hanggan anom o walong gulong, mga kapamilya na dae makatios na dae magtabang masqui diit, pati na mga bangko, amigo y amiga na puedeng utangan.