Masqui mauran, napano man siyempre an covered court, mga tent asin lobby kan municipio kan magpahanda si alcalde Samuel Laynes sa sainyang ika-sisenta y dos na compleaño.
Iguang representasyon na mga opisyales an onceng municipio asin cadaclan kan tres cientos quinceng barangay.
Minsan dae nakaabot an gabos na honorable kan capitolyo, aduman si Gob Boboy Cua, magcapirang vocal asin mga amo.
Sa mga nacaatender na alcalde, prominente sinda Mayor Johnny Rodulfo kan Bato, Mayor At-at Tayam kan Gigmoto, Mayor Etal Robles nin Panganiban y Mayor Jun Camano nin San Miguel.
Namihar daa nin sayaw si Mayor Johnny, matapos na istoryahon caini sa katawohan an saiyang mamundong inagihan sa dating kaalyado y ngonian primerong congresista nin Batalay.
Nagpataratara man an bise alcalde nin Pandan na si Eric Rodriguez, si Vice Mayor Noel Morales nin San Miguel y Vice Mayor Jennifer Tuplano nin Viga.
Inimbitaran man daa an enterong opisyales y empleyado nin DPWH caibahan si DE Simon Arias, alagad an nacaabot sana an duwang kalaban kan tunay na amo nin Batalay Public Works and Highways, he! he! he!
Igua man daang nakihampang na mga taga-CatSU alagad baguing nagpatago an cadaclan ta baad maisihan kan saendang selosong amo, he! he! he!
Dae man daa inimbitaran si Cong Yoloyo sa okasyon sa isi ta nang dahelan alagad nasa kataning na lugar sa San Roque man sana an lehislador nin Batalay, kaiba an saiyang mga bodyguard.
Segun sa mga nacaisi, doseng lechon an pinaradpad sa plaza para pandagdag sa handang liempo, sotanghon, humba, kasili, dinuguan, dinakdakan, mani, puto, asin iba pa. Dae na ngani daa nailuwas an darangon na manok ta dae na nalugaran.
Baha man an inumon, magpoon sa Ginebra, Fundador y Alfonso sagcod an mga binitbit na imported na alak kan ibang visita.
Bago nagparibod, igua pa daang pabalon an mga capitan y SK chairman hari qui alcalde Samuel, Gob Boboy y TGP Cong Bong Teves.
Marinas na senyales para sa maabot na padaraculan nin tawo….
*****
Igua na man palan nin linyada si Cong Yoloyo para sa mga municipio. Ini an osipon sako nin tahodan na politico.
Sa Calolbon daa, an palabanon si dating alcalde Aly Romano y duman sa Caramoran si atorni Tamayo. Alagad an pagcaisi daa nin mga observador, habo na si Dok Aly na magsawsaw sa politica.
Sa Pandan an maiba daa sa duwang congresista nin Batalay iyo si dating alcalde Olog Tabligan.
Duman sa Bagamanoc, an makalaban sa presenting hade saro daang consejal. Sa Payo, saro man na dating piskal an mapurbang patumbahon si Mayor Etal.
Sa Gigmoto, saro man na consejal an palabanon pero an dangog ko hanggan sanang bise mayor ta cierto daang lalampasohon ni Mayor At-at.
Sa Viga, sigurado na si bise mayor Jennifer Tuplano na an magiging bise alcalde iyo an magraduar na alcalde Bong Tarin.
Si dating consejal Edna Tomagan daa an itampad ni Yoloyo qui Mayor Paolo Teves pero nagnegar man daa an aqui nin dating alcalde.
Diyan sa San Miguel, an manok daa kan gatocaw na congresista iyo an naderota kan 2022 na si Tony Teves, laban sa kung sisay na aqui ni Jun Camano an iapon sa rueda.
Sa Bato, cuarta daa an palakawon kan Batalay House of Representatives para botohan an aqui ninda, y sa Virac si dating alcalde Posoy an saendang candidato.
Ni sarong incumbent na mayor dae an campo ni Yoloyo, ta aduman gabos sa bag-ong iribahan nin mga Cua y TGP.
Mabag-o pa an linyadang ini, ta an mga kinahang baad makaisip-isip pa na masayang an saendang tinipon, he! he! he!
Sa ngonian na panahon, lalo na sa presenteng palakaw diyan sa laog kan Great Wall of Batalay, delicado an maghalat nin ayuda sa duwang congresista lalo na ta mas papaboran caini an saendang pagdalagan pati na an primerong sultada kan aqui.