Maabot na palan sa tres cientos milyones pesos an premyo sa 6/55 na bola kan PCSO Lotto. Labing ciento treinta milyones pesos man an puedeng tamaan sa 6/58.
Ciertong dacul na mga politicong hababaw an bolsa, pati na mga naderota kan nacaaguing eleksyon, ibali pa an mga pinangaturogan manaltag nin pangkurukay, an sige an taya sa duwang lotto draw na ini.
An ganahon sa 6/55 puede na pang-congressman, tibaad matad-an pa ngani, y an sa 6/58 hanggan gobernador sana siguro.
Alagad mabawas na an kakabigon, ta maenot ngona magsimit an BIR, tapos mapasiguro pa sa familia pati na an mga taga-luwas, bago pa manaltag sa mga parahagad nin balato.
An matada, puede nang isugal sa borolang sa Mayo 2025, he! he! he!
*****
Krismas na palan sa Pilipinas, nadangog na an mga kantang pangcaroling sa radyo.
Lalong madakul an mavisita sa mga politicong gatocaw o gatindog, especialmente an mga propesyunal na para-solocit na bitbit an expired na reseta o caya imbitasyon sa pabertdey o anibersaryo, he! he! he!
An mga pirming nasa Isla Maogma, lalo na itong mga mahigos maglaog sa oficina, siguradong dae makaligtas sa mga holdaper na armado nin papel.
An makaligtas sana iyo itong awat nang tinandaanan an pandok kan mga para-solocit. Dae man mabawasan an yaman kan mga soboot macandidato na taga-ibang lugar. Cabali dinai an sarong dating heneral, na sagcod ngonian dae pa nag-aparecer sa Isla Maogma, minsan inimbitaran na nin sarong daculang organisasyon na mahilig mambâbâ.
Igua pa palan nin sarong makalibre, an halangkaw na opisyal sa CatSU, ta hahagadan nin ID an mga para-solocit kan mga guardia civil sa trangkahan.
Dae man magdayô sa saiyang palasyo ta harayo, mahal an pamasahe ta ma-double ride, matarhod an dalan y igua pang gabantay na duwang leon sa entrada, he! he! he!
*****
Segun sa Corte Suprema, puede nang ibalewala an kasal kung an lalaking agom dae na gaparibod sa familia na daeng katutubod na rason.
Ini daa lalo na kung an lalaki nangibang bahay y daeng sustento sa familia, ta senyal ini na dae siya nakasabot kang responsabilidad nin sarong agom y ama.
Caya kamong mga mahilig maglamyerda nin pirang semana o habo magparibod kung gatrabaho sa abroad, mag-ingat-ingat ta tibaad hagadon sa Corte kan mga binayaan na agom na parakniton man an sainyong papeles sa kasal.
Hagadon ta daw sa satong congresista, an gatocaw asin gatindog, na magproponir nin ley na dapat an agom na mahari, lalaki man o babaye, ma-apply nin leave of absence sa babayaan na agom pati na mga kaakian.
Iguang termino an leave, y kung dae makaparibod sa talaan na panahon, afuera na sana kung iguang calamidad o naotsan sa viaje, automatikong kanselado na an kasal, he! he! he!
*****