Naimbitaran palan si alcalde Samuel Laynes kan Virac duman sa pabertdey kan gobernador nin Sorsogon, an famosong si Edwin Hamor, sa agom niyang alcalde nin Sorsogon City, si Ester Hamor.
Kasabay sa mga visita si Senador Tito Sotto asin iba pang mga lideres sa paghiling kan Pasalinggaya para qui Mayor Ester na inabot nin alas tres nin maaga natapos.
Segun sa mga nacaheling, ciento siete mil na tawo an nagbali sa pa-raffle, an cadaclan alas ocho pa sana nagpila duman sa coliseum nin Sorsogon.
Dae mo man mabasol masqui sinda magbalon nin pangodto asin pamanggui ta an itinaltag na papremyo ni Gob Hamor iyo ini: sampulong Toyota Wigo, ciento cincuentang motorsiklo, sanggatos na baka na regalo ni Masbate Gov. Tony Kho, mga repridyeretor, electric fan, washing machine asin TV.
Igua pang dae mabilang na cash giveaways na cincuenta mil, treinta mil, veinte mil, quince mil, cinco mil, asin quinientos cincuentang a tres mil.
Pinamidbid daa ni Gob Hamor si alcalde Samuel qui Gob. Kho na iyo an susuportaran niya bilang congresista nin Catanduanes sa 2025 y an hade kan Masbate masuporta man daa, lalo na kan maaraman na kaapelyido niya an mga ginikanan kan alcalde nin Virac.
Sabi kan mga nacaisi, an tugon da ani Gob. Hamor qui alcalde Samuel, bako na sa plaza nin Virac o sa VTC Metrowalk gibohon an masunod na Pasalinggaya sa Deciembre ngonian na taon.
Duman na daa sa Catanduanes Athletic Complex ta manaltag daa sinda nin tiket sa enterong onceng municipio kan Isla Maogma.
Kung ano an papremyo sa daculang pa-raffle n aini na baad maagahan man sa panaltag, an gobernadora sana an nacaisi.
Caya halaton ta sana an anuncio pag-abot nin Septiembre o Oktubre…
*****
Igua nang gaburotwa na interesadong mamakal nin voto sa masunod na eleksyon.
Diyan daa sa Bato, posibleng maabot sa lima an mapaaragaw sa puesto ni bise alcalde Boroy. Ini daa pinangengenotan ni Consejal Teston na paborito kan mga mapusta sa derby nin politica.
Tibaad daa maglaban pa si Boroy, lalo na kung makakua nin capital, ta adiyan man an saiyang mga among congresista.
Saro pang naosipan na matapsok sa rueda iyo si dating Bise Mayor y PBM Bolotoy, pero an problema daa tibaad guyod man caini an sarong dating candidato sa bise gobernador.
Sa kanatad caining San Miguel, cierto nang saro sa mga aqui ni alcalde Jun Camano an ituon caini sa trono. Kung iguang mangahas maglaban, diyan ini mahari sa miembros kan Sangguniang Bayan o sa mga dati nang nagcandidato.
Sa Caramoran, buhay na naman daa an dating alcalde na si Agnes Popa, ta sige nang toktoraok contra qui Mayor Glenda sa isyu nin pagmina sa Obi.
Sa masunod naman an ibang banwaan…
*****
Ngonian na semana, iguang mga barangay sa manlaenlaen na banwaan, lalo na sa Virac y San Andres, na sarabay an pagselebrar nin kapiyestahan.
Base sa mga nacaaguing taon, dae naharian nin mga tawo asin vehiculong naaksidente sa panahon na ini ta nakainom an drayber.
Ta sagcod sa ngonian dae pa man gaimponer an gobyerno kan ley contra sa mga bortok na gamaneho, cotana magpaguiromdom an mga autoridad sa mga mahabhab asin mamamam na magluway-luway sana.
Dae man nin problema kung panoon nyo an saendang mga tindos nin pulutan , cerveza, Ginebra, Emperador, Fundador o Alfonso, basta kung napoypoy na o nasakitan na magtindog, dae na magviaje.
Sabihan an mga kagharong na kargo kan konsiyenya ninda kung tugotan nindang magmanejo pa an mga visitang gadapaydapay na ngani.
Kung dae mapugulan, paolyohan ngona…