Kung an mga parakaon nin carne namurong kung ngata tres cientos kilos na an cada kilo nin carneng orig, bako ini por sobre ta tapos na an Semana Santa.
Pakatapos nin pirang taon, ngonian naman sana ini nangyari na an bakal sa sarong kilo nin carne pareho na sa presyo nin saraday na lapu-lapu.
Segun sa mga parabono asin parasimber nin orig, nag-itaas daa an presyo nin buhay na orig, diyes pesos cada semana magpoon kan Marso kan ini ciento sitenta pa sana.
Ngonian daa uminabot na ini ning ciento nobenta an kilo nin live weight.
Kung an madunong na paraataman pinainom pa nin dacul na tubig an saiyang orig kan banggui bago pinabakal kinaagahan, siguradong lugi an parabono sa timbang, grabe an resiko.
Harimbawang sitenta kilos an timbang kan live weight, pagbonoa an orig, an matadang carneng limpiyado bawas na nin lampas sa normal na dose kilos.
Tibaad daa mag-abot na ini nin tres cientos veinte an kilo ngonian na Abril, lalo na ta an mga parabono nin orig na taga-Maynilang kayganda, nakaabot na daa sa Albay y Camarines Sur nin pamakal nin orig.
An iba ngani daang taga-isla na namakal nin orig sa ibong, dae na nagviaje ta malulugi sa transaksyon.
Pabor man an halangkaw na presyo nin carneng orig sa gabos, lalo na ta gadakul an mga obese o sobra ang taba sa ginhawa.
Dae tabi afectado an mga mahilig sa hilaw na carne. Kung manamit nin putahe sa luwas, dae sana tabi pagbakalon masque barato, ta mangaipo ka pa nin repridyeretor na magastos imantenir…
*****
Nakaolakit palan an mga tawong apuradong makaabot sa icaduwang buhay.
Napatunayan ini kan nacaaguing bulan sa banwaan nin Virac. Tolong sunod an nagpurbang magkurintas nin lubid na nakabitay, duwa an naotsan, saro an naisalbar pa.
An enot daa inakusaran nin pag-abuso sa katrato y an icaduwa dati nang iguang tama an utak ta inabisuhan daa ngani an familia na pagtagoon sana an mga matarom na bagay sa harong.
An icatolo, nakidulak sa agom, kung manongod sa carne dae man sinabi. Nakaligtas ini dahil sa amay na
pag-acuder kan mga kanatad asin familia.
An problema ta puro palan lalaki an mga ini, contra sa pagtubod kan cadaclan na an mga macho mga matibay an puso, dae nalugad nin mga chismis y anuman na makauyag nin persona.
An totoo kaan, an sisay man na tawo posibleng abutan nin panahon na maluya an resistensya sa mga problema nin buhay. Caya magayon na an familia dapat adyan na pirmi para magsustenir asin magtabang tanganing mapakusog an saendang pagtubod sa Kagurangnan na iyo an kagtao nin buhay sa saenda.
*****
Abril na ngonian, pitong bulan na sana bago magpalista an mga ambisyoso na magpalista sa daculang derby sa 2025.
Naenot na siempre an mga nacatocaw na mga politico, na ciertong igua nang mga ginibong mga listahan nin mga posibleng candidato sa cada posisyon pati an mga lider sa barangay asin sa headquarters.
Masunod naman an mga pinangaturogan, mga pinangom-om, mga bag-ong dacop asin iba pang an pagtubod na pinakusog nin mga duro-demonyo, puede na sindang maging servidor nin banwaan.
Mayad an mga tahodan nang mga politico ta isi na kung sisay an mga tawo ninda sa cada barangay.
An mga bubuhian pa sana sa rueda nin politica, posibleng dae pa bisto an saendang mga magiging parabakal nin voto sa tres cientos quinceng baryo nin Isla Maogma.
Kung an makua nindang mga lider mga dati nang kapot kan mga nacatocaw, tapos na an burulang minsan harayo pa an mga tarambodan sa sultada.