Simple man sanang saboton an isyu manongod sa ambulancia kan Capitolyo na pinagamit sa CatSU kan 2021, panahon nin COVID-19 pandemic.
Ang tinawan nin ambulancia iyo an gobyerno provincial, caya ngani an gobernador an nagpirma kan papeles kan ini kinua duman sa PCSO.
Maguiromdoman na ini nangyari pirang bulan pa sana an nakarihis kan pilion kan Board of Trustees si Azanza bilang presidente kan Hunyo 2021.
Ngonian, sabi ngani kan presidente, igua sindang “internal arrangement” na an ambulancia, minsan pagsadiri nin Capitolyo, ipagamit sa CatSU sa pagsirbe sa mga estudyante y empleyado.
Kung toltol na hororon kutana, ta an ambulancia sadiri nin provincia, an manejo caini empleyado nin provincia, minsan pang an unibersidad an magkarga kan krudo.
Kan Noviembre 2023, sinuratan ni gobernadora an PCSO sa intensyon na ibaryo na sana an ambulancia sa pangaran kan CatSU ta iyo an nangaipo.
Alagad, nagsimbag an PCSO na base sa reglamento kan Medical Transport Vehicle Donation Program (MTVDP), an pagdonar nin ambulancia limitado sana sa mga lokal na gobyernong kulang an capasidad magbakal caini y directang gatao nin serbisyo sa salud asin emerhensya.
Dae kabale an mga agencia nin gobyerno nacional arog kan CatSU ta igua man sindang sadiring fondo.
Entonces, dae puedeng ibaryo an ambulancia sa CatSU.
Base sa mga documento, sinuratan ni Gob. Cua an presidente kan Enero 22, 2024 manongod sa pasabot kan CatSU y naghagad pa ngani nin dispensa ta babawion na sana ensegida an ambulancia ta tibaad maafectaran an relasyon kan LGU sa nagdonar caini.
Iyo na ini an ginibong isyu kan hadi-hadi ning CatSU, na segun sa mga nacaisi nagpaabot na sa Capitolyo na siya an malaban sa gobernador sa 2025 kung dae siya kukuahon na candidatong congresista katukal ni alcalde Samuel Laynes.
Tinawan pa nin cuarenta y ocho oras an gobernadora para simbagon an isyu na an ambulancia, segun sa presidente iyo an panuga kan manejamiento base sa mga text messages sa dating amo.
Bayaan ta ngona an simbag kan gobernador, na nagsabing dae na ngona binawi an vehiculo sa CatSU tanganing dae na magamit pa sa politica an isyu.
An mas magayon na hapot dindi, kung isi kan presidente, na graduado nin abogasya, na nunca magiging sadiri kan CatSU an ambulancia na nakapangaran sa provincia, ngata ta dae na sana nagbakal nin sadiring ambulancia kan 2023?
Guiromdomon nyo tabi, mga tugang, na kan nacaguing taon nagbakal an administrasyon ni CatSU nin apat na bus sa halagang P4.5 million cada saro.
An P18 million daang ginamit sa pagbakal nin apat na bus, segun sa mga taga-CatSU, kinua sa income kan unibersidad hari sa tuition fees y iba pang pigakitaan caini.
Kung an mga bus na ini, nagamit lamang oro-aldaw, an mga estudyante y empleyado an makatestigo.
Segun sa COA, an special trust fund na kinuahan daa kan fondo, puede sanang gamiton sa instruction, research, extension or other programs/projects…which must be of the same nature as instruction, research and instruction.”
Kung napangyari an pagbakal kan mga bus, ngata ta dae na sana sinabay an bag-ong ambulancia sa pa-bidding caini, minsan balga sa probisyon kan Republic Act 8292, o ang Higher Education Modernization Act of 1997?
Sabi kan mga sehongan diyan sa kahadean nin hamon, bako man sana ini an primerong vez na nagbakal an manejamiento nin mga equipaje gamit an ganancia kan unibersidad.
Dati na daa ining pigreparo an presenteng manejamiento kan mga auditor kan 2022 sa pagbayad nin halos duwang milyones pesos na honorarium sa sadiri man sanang opisyal nin unibersidad sa soboot pagtrabaho ninda sa sarong special project.
An proyecto daang ini iguang katuyohan na gibohon an CatSU y an branch sa Panganiban bilang “Smart Campus.”
Kung hohorop-horopan nindo, mga parabayad nin buwis, epektibo an proyecto ta dae pa ngani nahaman, madunong na an magcapirang opisyal na nacarecibe nin honorarium, he! he! he!
Ta maubusan na kita nin espasyo, tawan ta man nin lugar an patanid ni Atorni Puting Buhok manongod sa ambulanciang sinubri na habo na iribod.
Bako daang cuarenta y ocho oras an itao niya sa mga invueltong nanunungdan kundi hanggan sa Simba, Febrero 4, para iribod an ambulancia sa gobyerno provincial.
Kung dae pa daa ini sa solar kan Capitolyo sa Lunes na aga, masang-at na siya ora mismo nin reclamo sa Ombudsman contra qui gobernador y an presidente kan CatSU sa pagbalga kan reglamento nin PCSO.
Helingon ta daw kung ano ang mangyayari….