Dae pa ngani tapos an sarong taon pakarihis kang 2022 elections, igua nang mga senyales na nagpoon na an campanya para sa masunod na pirilian.
Duman daa sa San Miguel, an nakaprontera na daang tawo sa importanteng actividad kan kapiyestahan iyo si Ruel Camano, an aqui ni alcalde Jun Camano na maretiro na sa politica sa 2025.
An aqui na daa an nag-sponsor kan paboksing asin palabas nin singer na si Lyca kan nacaaguing semana, naenot pa ngani an pangaran sa saiyang ama, he! he! he!
Sisay naman daw an maluwas na kalaban caini maliban sa mga Teves?
Duman daa sa Bato, igua na daang naheling na tarpaulin sa piyesta na bako sanang si Gob Boboy y Bise Gob Bos Te an nakakahang kundi kaiba na an alcalde nin Virac na si Samuel Laynes.
Sabi kan nakaheling, bako na naman ining bag-ong timpla ta sinabod na an kape kan 2022, caya puro na gatas an inumon kan mga votante, he! he! he!
Segun man sa mga nacaisi, tibaad magdalagan man daa an presidente kan CatSU na si Patrick Azanza lalo na ta matapos man an saiyang termino sa 2025.
Aduman man daa ini sa San Miguel kan nacaaguing semana y sa Calolbon bilang visita sa papiyesta kan mga Camano y pamiting ni alcalde Nonong Mendoza.
Adyan sanang pirmi si atorni Puting Buhok, na nagpakalag naman sa Bato sa pahanda niya sa bag-ong atorni kan mga Rodulfo.
Siempre, kung sisay an tatawan nin basbas kan mga Cua iyo an magiging lamang na candidato sa pagka-congresista sa 2025.
Kung harimbawang madagos an plano, maretiro na an gobernador sa capitolyo, minsan igua pa siyang duwang termino na natatada ta naputol an pagtocaw niya kan 2016-2019.
Duman na sana daa ini sa municipio nin Virac mapuropahingalo ta medyo magian an trabaho. Sisay daw an malaban, si Hector?
Pagsakat ni Bos Te sa pagkagobernador y cierto man sanang daeng makadaog sa saiya, mababakante an posisyon kan bise gobernador.
An mga posibleng magdalagan diyan si PBM Obet Fernandez nin Panganiban y si alcalde Paolo Teves kan Baras.
Puede man makisawsaw si PBM Jan Alberto nin Virac, minsan ini aqui pa y kulang pa an tahod sa politica, lalo na kung tatawan ni dating alcalde Cito nin parte kan mga ginanahan niya sa bulang asin iba pang sugal, he! he! he!
Tibaad mabanwit naman an mga votante sa sabon na panlaba y kiliti sa mga daraga y darana, he! he! he!
*****
Cadaclan daa kan mga pampublikong escuelahan sa isla tigcabangang aldaw na sana an clase.
Iyo daa ini an napagcaoyonan sa DepEd division office matapos na magpaluwas nin memorandum an regional office na bahala na an mga principal magdesisyon kung anong claseng blended learning an ipasunod sa tahaw kan mainit na panahon.
Segun sa desisyon, aga sana malaog sa clase an mga aqui sa elementary asin high school para sa face-to-face na lecture kan saendang mga maestra.
An hapon para sa mga assignment y kung ano pang proyecto an ipagibo sa saenda.
Sa siring na paagui, maiiwasan kan mga aqui an pinakamainit na mga oras kan aldaw magpoon ala una hanggan alas tres.
Kung hahapoton siguro an mga maestro y maestro, mas gusto nindang entero face-to-face, basta iguang proteksyon sa init an mga aqui.
Bako man gabos na escuelahan mga maaningahot an classrooms. Sa Virac ngani y daraculang escuelahan, cadaclan kan mga room igua nang mga electric fan, kung minsan tig-anom pa.
An masakit sa blended learning ta atang nabawasan na an oras para sa leksyon, kulang man an namatidan sa online o modular learning.
Cotana arogon man kan CatSU an estilo sa DepEd, lalo na ta golpi an afectado kan pag-online kan clase, bako sanang mga negocio kundi an mga estudyante.
Mas gusto daa nindang nasa classroom ta igua lamang nin electric fan na libre.
Sabi ngani nin sarong maestro, mga bolbolon na an mga ini, kaya na an init basta iguang payong…