Dae palan nadagos an pagbalasa kan mga amo sa DPWH.
Segun sa mga sihongan sa SIV, binawi ni DE Cagomoc an orden qui Dayunyor Guerrero na maglayas sa puesto sa Quality Assurance Service.
Caya an nangyari, balik sa dating puesto sa planning an cotana nagtocaw na sa QAS, layas man paluway-luway an nagtocaw sa planning na harani sa kusina nin duwang congresista sa Batalay, he! he! he!
Natakot man palan sa kaso an mga bag-ong amo sa DPWH Catanduanes pati na an regional director na kapot sa taringa kan mga congresista sa Isla Maogma.
Ngonian, magmarasid-masid sana ngona an mga karbaw ninda sa DPWH, saka na unaton an gakod sa aregolyas kung kaipuhan, he! he! he!
*****
Iguang reclamo an sarong ciudadano sa soboot mga tindahan y carinderia sa laog nin mga oficina de gobyerno.
Segun sa reclamador, sala man na an mga capitalista caini gamiton an corriente y tubig kan agencia para sa saendang negocio. Igua pa ngani daang an mga job order na empleyado iyo an kusinero y tagasirve kan pagkaon.
Ngonian, awat na ining nangyayari sa mga agencia de gobyerno sa Isla Maogma.
Diyan sa San Isidro Village, igua diyan nin oficinang an sarong lamesa pigausar bilang sari-sari store.
An laog kan comoda anas chicheria, mani, biscuit asin iba pa. Pag kulang an comoda, an cabinet sa gilid napakinabangan pa, he! he! he!
Dae na caipuhan kanghan nin karatula ta isi na kan mga empleyado kung haen an tindahan, he! he! he!
Bako sanang sarong oficina ini, mga duwa o tolo an adyan sa SIV.
Sa Capitolyo asin iba pang mga agencia de gobyerno, posibleng dacul pa an arog caining mga servicio publico na iguang bayad, he! he! he!
Dae mo man mabasol an mga empleyado kung sinda magbakal sa mga turo-tindahan na ini, lalo na kung harayo an canteen o sira-sira store sa luwas.
Cadaclan kan mga ini mga kaopisina man sana an gapadagalan kan tindahan sa comoda, alagad igua man daang lo mismong an amo an nangapital.
Magayon caini, sabihan kan manejamiento an mga negocianteng ini na mangarkila na sana nin cuarto sa oficina y iparehistro na sa municipio an tindahan tanganing daeng problema.
Ventaje na an gaingat, lalo na kung igua kang mga kalaban sa laog, tibaad sa maabot na aldaw makaresibe ka na sana nin noticia kan Ombudsman….
*****
Kung kamo garibot sa población nin Virac, iguang mga parte nin tinampo diyan na pigarungkab para buhusan otro nin kongkreto.
Ini an mga ampaw na baldosang sala o daya an pakagibo, lalo na kung halangkaw an singil na porciento nin politico.
Igua diyan sa San Roque sa iguang ARDCI, sa tampad ni kapitan y pakalampas sa Division Office bago magriko pa Moonwalk.
Ini an dae pa naawat mahaman (mga saro o duwang taon) alagad pakaripas nin pirang bulan naghurupo na an semento y daog pa an bakong sementadong tinampo.
An hapot ngonian, kung napatanos ngani kan DPWH ining mga ampaw na ining tinampo sa San Roque y Capilihan, noarin man daw bubungkalon an mga ampaw na parte kan Moonwalk road pasakat hanggan airport?
Igua man diyan nin magkapirang bloke nin baldosa na matapô na, makauyag na nin vehiculo.
Inabot daa ini nin halos tolong taon bago nahaman dahel sa pandemya, lalo na ta dae nakaparibod an contratista….
Bako pa ini an mangyayaring mga kongkretong ampaw.
Caya panahon na para maghiwas an gabos na gagamit nin tinampo.
Habang gatrabaho an contratista, kuahan nin video o litrato an paghalo. Litratohon an mga batak na maluwas o an luway-luway na pag-ampaw kan baldosa.
Dangan ipadara sa Facebook page nin Tribune o DPWH tanganing maaksyunan.
Sayang an saendong oras sa social media kung dae niyo gagamiton an diit sanang panahon sa pagreparo kan mga sala nin satong gobyerno…