Uso palan ngonian an areglo maski sain.
Kan nacaaguing semana, igua na daang pinaabot na mensahe an padron kan soboot nangawkaw y nanghapiyap sa familia kan victimang empleyada ning Cesar State University.
Kung ano ang mensahe y gurano an areglo sa bolsa, dae man sinabi.
Tibaad huru-halangkaw an invueltong cuarta, lalo na ta sa Civil Service Commission pa sana, dismissal sa puesto an penalidad sa kasong sexual harassment sa mga nanghapiyap ning daeng permiso.
Dae pa dindi kabali an kulong, danyos perwisyors asin kasusupgan harimbawang siya mapatunayan na nagkasala sa Corte sa kasong acts of lasciviousness.
Ata daang kasalon na sa Abril an victima sa saiyang katrato. Kaya kung iguang areglo, tibaad libre na an gastos sa kasal, igua nang litson, mabaha pa nin inumon, he! he! he!
Alagad, masakit man kung palibrehon, ta tibaad awat nang gibo an bagay na ini, lalong mangahas na ipadagos an panghugam ta dae man napadusahan.
Duman man daa sa kasong perjury na isinumitir sa piskalya laban sa joven pang pulis na soboot nagbobowa sa saiyang affidavit laban sa paratahi nin maldos sa bulangan, habo daa magpa-areglo an victima.
Sinabihan daa ining isurit na sana an dos cientos cincuenta mil na ginastos niya sa abogado asin madagdag pa nin pakunswelo.
Desidido daang idagos hanggang matapos an kaso sa Corte. Dinara na daa an reclamo duman sa program ani Tulfo, kaya halaton ta na kung noarin ipaluwas an CCTV video kan nangyari sa bulangan ni Poroy.
Uya man sa kaso kan patong-patong na reclamo laban sa DPWH y qui Cong Yoloyo dahil sa pagbaryo kan fondong dos bilyones pesos y an implementasyon kan mga proyecto sa DPWH regional office, baguing dae man mapa-areglo si atorni Puting Buhok.
Segun sa saiya, lugi an mga taga-isla kung tutugotan an bagay na ini, ta afectado an ekonomiya lalo na an mga pagbuhay kan mga trabahador nin local na contractor.
Dae na daa maawat, tatarangkason na sa trabaho an mga ingeniero y iba pang casual sa DPWH diyan sa San Isidro Village ta diit na man sanang mga proyecto an natada para bantayan.
Habo na yata ni DE Joven na atubangon an mga honorableng bocal para simbagon an saendang mga kahapotan sa isyu, minsan bako man sigurong mga masakit na kahoronon an mga PBM ta an cadaclan saenda mga kontratista man, he! he! he!
Harimbawa daang mangorngog na si Joven y dae na magbarik sa puesto, dae na man ining pupuntahan sa CamSur ta ocupado na an tocawan na hinarian niya.
Entonces, aduman na ini ma-report sa DPWH regional office, makaibahan niya na an district engineer na pinalayas man kan enot asin icatolong congresista kan Isla Maogma, he! he! he!
*****
Puede na palan magdagdag nin footnote o diit na kuritkugit sa resolusyon o ordinansang ipinasar nin Sangguniang Bayan nin Virac minsan ini firmado na kan cadaclan.
Segun sa sarong consejal, nabigla siya kan maheling na iguang isinurat na klaripikasyon an bise mayor sa baba kan resolusyon na siya soboot habo na aprobaran an bagay na ito.
Sa pagkasabot kan veteranong consejal, an resolusyon o ordinansan pigabotohan kan cada miembro y an papel sana kan bise mayor magsunod sa mayoriya o caya mag-break kan tie.
Dae man siyang poder na magsingit kan saiyang dissenting vote sa ibaba kan inaprobaran nang resolusyon, segun sa saiya.
Saro pa, nag-file na daa si dating consejal Toy Gianan nin contempt sa Civil Service Commission laban sa enterong consejo da dae pagtubod kan orden caini na bayadan siya nin back salaries.
Segun sa ley, kung mapatunayan ini, papagbayadon an cada saro sa consejo nin sanribo cada aldaw da soboot sampulong bulan o tres cientos dias na dae ninda sinunod an orden kan CSC.
Magayon na mag-amot na nin pambayad an mga ini o caya magtaya sa lotto orawang amay pa….