Kabali palan si Catanduanes PNP provincial director Col. Benjamin Balingbing Jr. y mga pag-iribang colonel sa mga pinagsumitir nin courtesy resignation ni DILG Secretary Benjamin Abalos Jr.
Segun sa osipon, nagtubod daa an amo kan Campo Camacho sa orden kaya sinda ngonian gahalat kung dai aakoon an saendang paghale sa puesto.
Kung sabagay, dae man nin masabi an mga tawo sa Isla Maogma kung bigla na sanang mawara an bililan na pulis ta bihira man ngani ini maheling nin publico (bako sana an macuapo ni Nestor).
An gusto sana daa caini magparakulong sa saiyang oficina y ni dae ngani nakihuron-huron sa local media.
Dati na daang pinangakuan ni Col. Bililan an mga taga-media na hahampangon sa sarong maogmang asin maboteng okasyon alagad natapos an Christmas Cheers, Pasko, Niños Inocentes y Three Kings, daeng imbitasyon na nagbutwa.
Anod aw kung suratan na sana ninda si Sec. Abalos na akoon na an courtesy resignation kaini tanganing permanente na niyang dae makahuron an local media?
*****
Sabi kan mga sihongan sa municipio nin Virac, an dae pa nahaman na P200 million na provincial integrated terminal and business complex na itinogdoc diyan sa Community Hub sa San Isidro Village, awat na daang pinirmahan na “100% substantially completed” kan mga nanunungdan na opisyales kan DPWH regional office y municipio nin Virac.
An papeles daa rinosnosan kan mga opisyal nin DPWH y an alcalde nin Virac kan Enero 2022 pa, duwang bulan bago an campanya sa eleksyon y limang bulan bago naghari sa puesto an alcalde.
Dae man nin sinabi an mga chismoso kung iguang pahanglas na itinao para maging magian an pagrosnos sa papeles minsan dae pa lamang nin kamhanan an proyecto.
Sa ngonian, dae pa ngani naocupar y nagamit an facilidad ta dae daang paluwasan nin tubig an drainage system.
Saro pa, dae napugulan an paglaog nin tubig uran sa basement parking kan sarong edificio. Igua man daa cotana nin duwang bombing dae gasabog ngudi dae daa kayang supsupon an gabos na tubig lalo na kung golpe an uran arog kan mga nacaaguing semana.
Kung harimbawang dae na mag-aksyon an director kan DPWH Bicol, magayon na magreclamo na sa Ombudsman an municipio.
Mientras tanto, puede man na apudon an duwang arkitektong nagmaneho kan proyecto y sinda an sugoon na mag-apply nin permit sa DENR y BFAR tanganing mabuhian ini nin tilapia, bangus, pasayan y kasili, he! he! he!
*****
Sagcod ngonian, dae pa daa nabayadan an na-stranded na dating consejal kan Virac.
Igua daang diferencia an resolusyon na ipinasar kan consejo caya dae na pirmado nin alcalde.
Nagtao na daa nin authorization an mga nagpirmang mga miembros kan sanggunian alagad dae nakakahang kung sisay an tinawan nin authority.
Segun sa ley, an bise mayor an iguang autoridad na magpasueldo sa mga consejal y mga empleyadong nasa plantilla kan SB.
Sa ngonian, dae pang bareta kung ano na an nangyari duman sa reclamo kan ex-councilor sa junta provincial.
Sa paghiling kan mga chismoso, siguro aabisuhan na sana an mga consejal na bayadan na an utang tanganing dae nang problema.
*****
Gahapot daa an mga TODA sa Virac kung ngata sagcod ngonian dae pa naimplementar an ordinansang ipinasar ni consejal Toto Mendoza manongod sa pagrenew kan mga permit ning mga tricycle.
Segun daa sa ordinansang ini, an susunodon na paagui kapareho sana kang sa LTO.
Ang ultimong numero kan plaka iyo an bulan kan pagparehistro, tanganing an mga traysi dae magsurusuan sa tampad kan municipio kung Enero.
An problema daa, dae pang orden na narecibe an licensing office.
Marinas na reparohon dagos kan oficina ni alcalde Samuel an bagay na ini.
Puede man siguro ini gibohon sa mga negosyong ga-aplay nin permit….