Grabe an gurumod-gumod ngonian kan mga parabakal sa saod, lalo na itong an laog man sana kan bolsa ginatos.
Atang mahal na an sila magpoon sa turay hanggan lapu-lapu, sinabayan pa kan halangkaw na presyo nin mga maritatas asin gulayon.
An sebolyas uminabot na sa P320 an kilo, caya an sarong pidaso veinte hanggan treinta pesos an bayadan mo.
Ini daa kagibohan kan mga smuggler na pigalimitaran an paluwas kan produkto, tanganing sinda asin an saendang mga kakumplot sa gobyerno grabe an deligencia.
Daog pa ngani an sebolyas nin siling halaba, na an presyo ngonian P400 a kilo.
An duwang ini puede nang ipangregalo sa maabot na Krismas, ta an duwang pidasong sebolyas y apat na sili malampas na sa sanggatos an bayadan mo.
An limon, kamatis, talong asin lay-a, P120 an kilo. An repolyo P140 mantang an patatas P130.
Iyo na ini an pigataram kaidto kan mga gurang, pati na ngonian kan mga nasa agriculture office.
Magtaranom nin ordinary man sanang gulayon arog kan limon, kamatis, talong, lay-a asin sili, tanganing dae ka na kaipuhan magpasaod para mag-gumod-gumod.
Kung iguang sinsilyo, mamakal na nin pisog sa tindahan ni Joza diyan sa saod. Kung dae, mangahang sa municipio duman sa MAO ta igua pa man yatang tadang mga vegetable seeds na panaltag.
Dae kang mahaman kung puro sana reclamo, magtanom tanganing iguang aanihon.
*****
Didiit nang malaog an sarong taga-baryo na cotana mahagad nin tabang qui Cong Yoloyo.
Dae na daa su karatula duman sa soboot oficina caini sa tampad kan ARDCI, caya an pacahona sarado na an oficina ni Bato Alisto.
Tibaad daa pigakabit sana an karatula kung nasa Isla Maogma an congressman tanganing isi na kan mga parasolocit na dae sindang lalaoman kung iguang sesyon sa Gatasang Pambansa, he! he! he!
Alagad, tibaad gapasiguro man sana an mga nasa oficina ta kung sab-iton an karatula kan mga kalaban ni Cong Yoloyo, he! he! he!
*****
Nag-privilege speech palan daa an presidente kan SK federation base sa reclamo nin saro daang residente nin San Isidro Village sa Virac.
Segun sa honorable, nakaabala daa an mga opisyales kan municipio nin Virac sa ginibong barangay assembly ta inabot nin duwang oras an saendang torno.
An gusto siguro kan reclamador na residente, dae na kaipuhan an mga taga-municipio na magbalangibog kan saendang mga programa para sa barangay y simbagon an anuman na mga kahapotan.
An problema sana kan reclamong ini ta an Liga ng mga Barangay mismo an naghagad qui alcalde Samuel kan presensya kan mga opisyales nin municipio kasabay man kan mga representante nin DILG, PNP, BFP asin iba pang agencia de gobyerno.
Ano daw daa kung hapoton man an SK federation president kung ano man an nahaman sa pagtukaw nin anom na taon, lalo na ta bihira man daa ini mag-atender nin sesyon sa consejo nin SIV?
*****
Pirang semana na daa an nacaagui, dati nang nag-asigurar si Pres. Azanza na papatanoson an kubeta diyan sa elementary laboratory school.
Kung nahaman na ini, dae ta isi.
Basta an reclamo nin magcapirang magurang, sayang daa an plano kan maestra na magpaguibo nin kubeta sa laog mismo kan klasrum, lalo na ta dae na maawat mahaman na an bag-ong edificio para sa laboratory schools na babaryohan kan mga estudyante.
An masakit daa sa isyung ini ta dae man daa lamang garibok an mga opisyal kan homeroom PTA.
Pabayaan na sana daang maotob an soboot dating gawe na gabos na nakapotan caining clase, gapatogdok nin kubeta sa laog nin klasrum.
Ngata daa ta ini an gigibohon, sabi kan reclamador, kung an babaryohan na modernong edificio, dae man puedeng kanghan nin siring na kubeta?
Pano ngaya masanay an mga aqui na maggamit kan comfort room ninda?