dai man piga tuyo nita
diit diit nang nawara
ang satong cultura
haen na su satong mga canta
mga malambing na pang harana
su mga laruy-laruy ning ina
sagcod iba pang pilipino sa natura?
haen na su satong mga sayaw
tinikling, itik-itik, pandanggo
sayaw sa bangco
maski su satong pantomina
buda iba pa?
haen na su satong arkitectura
mga disenyong tatak pilipino
gikan sa forma ning payag
gibo sa kahoy, butong sagcod nipa
trayanggulong bubong
na panglaban sa bagyong macusog
ginacot ning mga nawi
na habang nalalabo
lalong mina hugot, minatuos
sagcod minacusog
kadakran kang satong mga pelikula
sarambayan, traiduran, garadanan
contra sa pilipinong naturaleza
na maboot buda mapasensiya
mina isog sana sa pagdipensa
ning pagkatawo o ning familia
sa pagmaw-ot hubang maging moderno
napabayaan tang harunon ang satong cultura
ning mga gibong dayo
kung dai ta macontra
ining bisyosong surog
ning salang pagbabag-o
saen daw kita makasampot?