Dae man palan gapanganga si Congressman Yoloyo sa Gatasang Pambansa.
Segun sa osipon, nagibo man palan daang halos dos bilyones an fondo para sa DPWH, an agencia na pinakapaborito nin mga buayang nakabarong.
Maray man ini, tanganing makaguda man an mga kadamay nin Bato Alisto, basta sinda an manggana sa borosohan, he! he! he!
Mahigos man ini si Yoloyo, lalo na kung bubuhian ini ning todo.
An problema ta igua minsan in sala sa hulog na mga desisyon, arog baha kaining pag-apply sa slot sa DFA passport.
An hapot kan cadaclan kung ngata duman pa sa Batalay masumitir kan mga caipuhan na mga papeles?
Ngata ta papagastoson pa nin dagdag na pamasahe haring Virac pa Batalay an mga ma-apply kung puede man gibohon sa Plaza Rizal o caya duman sa DPWH o sa CatSU?
An suspetsa ngani nin sarong chismosong politico, tibaad daa hehelingon pa sa listahan nin mga votante duman sa Batalay kung kisay nagvoto an aplicante sa passport, he! he! he!
Kung mainsistir an oficina ni Cong Yoloyo na diyan sa Batalay idara an papeles, magayon na reimbursaran ninda an ginastos kan aplicante sa dagdag na pamasahe tanganing kulang an muromuto…
*****
Sagcod sa ngonian, daeng bareta kung ano talaga an dahilan kun ngata nakarecibe si Superintendente Collano nin patakot na bobombahon an saiyang opisina.
An enot palan daa caining inapodan, bako an cuerpo de policia sa Virac, kundi an Explosives and Ordnance Division (EOD).
Kung iguang nakuang pampasabog, tunay na bomba o nasa kilikili o atotan, dae pang sinabi an mga imbestigador.
Bihira siguro makaresibe nin patakot an superintendente caya dagos naghagad nin inspeksyon sa EOD.
Kung igua man nin tawong kagibo caini, dae man sigurong planong magpaputok kundi takoton sana an sisay man na saiyang nauyaman sa DepEd.
An posibleng kagibo caini an mga dae napiling mga aplikante sa mga teaching positions, lalo na kung naisihan niyang an appointment bakong toltol.
Posible man na bako si SDS an target kan threat kundi saro pang opisyal na segun sa mga chismoso iyo daa an nasusunod sa mga appointment.
*****
Igua man nin pakinabang an kamas-kamas nin katawohan na magbali sa homeowners’ association ni Pay Olog, an promotor kan Pagmakolog Subdivision o Hologan Subdivision na itogdok diyan sa may lugar kan shabu lab.
Dae pa ngani nasabotan kung sinda qualificado sa programa para sa inaapod na informal settler families, an cadaclan daa kan mga aplicante, nagpaseroks na kan saendang mga papeles, nangahang na sa abogado y naghanda na nin pambayad sa kung anong hagadaon kan mga promotor.
Primero, madacula an ganancia kan Palta Small ta madagdag an residentes caini. Dae pa ngani napun-an an proyecto, sobra nang tres mil an nagkua nin cedula sa municipio na sinda soboot taga Palta Small, minsan hari sinda sa manlaenlaen na banwaan sa Isla Maogma.
Icaduwa, pabor ini sa mga igua nang familia na sagcod ngonian dae pa pigahirasan nin dagang togdokan kan saendang mga magurang.
Icatolo, kung harimbawa man na dae ini madagos sa kung anong rason, lalo na kung iguang nakinabang, nagtaribong lamang an cuarta sa Isla Maogma, minsan tabagon an cadaclan sa Maynilang kayganda, he! he! he!
*****
Solamenteng si Gob Boboy na sana palan an puedeng mag-aprobar kan mga contrata nin job order na empleyado sa enterong capitolyo, kabali na an junta provincial.
An gustong sabihon caini, an bise gobernadora pati na an mga bocal kaipuhan na magsumitir nin listahan kan mga job order na gusto nindang ilaog sa SP.
Anod aw kung kabali dindi an mga paragabi sa farm, kusinero sa harong, alalay sa pribadong opisina, o mga pinalaog para palaogan?
Dati nang pigreparo kan COA an pagkadinakul na casual diyan sa capitolyo pati na sa SP, na pigabayadan nin milyones cada bulan kan publico (cabali si Noynoy). Sabi kan mga nacaisi, an mga gaturukaw-tukaw sa mga opisina kan mga bocal sa SP diit sanang parte kan mga JO ninda.
An cadaclan daa caini nasa harong, farm, sa mga barangay, escuelahan asin iba pa.
Ano daw kung magbag-o na an palakaw sa mga JO?