Bako pa daang tamang panahon para ibogtak an submarine power cable.
Ini an soboot sinabi ni Cong-elect Yoloyo kan hapoton manongod sa proyectong pinagproponir kan naderotang si Cong Hector.
Tibaad daa dae man sana pondohan kan malaog na administrasyon lalo na na daculang fondo an invuelto, sabi pa kan elegidong congresista na dae ngani namroblema kan soboot hinabas sa saiyang veinte milyones pesos.
An gigibohon niya daa, kakahoronon an Dificelco y Suweco tanganing madeterminaran kung ano talaga an problema sa suplay nin corriente tanganing matawan nin solusyon.
An problema sana kan pag-isip niyang ini, magpoon pa kan panahon ni Cong Saryo, dacul nang energy summit an ginibo tanganing eksaktong macierto an problema sa corriente.
Daeng nangyari, sayang sana an pangimbitar nin soboot mga eksperto hari sa NEA, ERC y DOE, sayang an pamirindal sa mga nag-atender, sayang an riwoy na pinatapsik kan mga adik sa mikropono, pwe!
An problema sa corriente bako man sanang an luma soboot na linya nin Dificelco, kundi pati na an mga depektibong contrata na cotana apat an hydro power plant na tinogdok, alagad duwa sana an nahaman, pareho pang palyado.
An caipuhan sa isla tanganing masustineran an mga saraday na diesel genset iyo an daculang base load plant na arog kan 3.6 megawatt na plante caidto kan Napocor y CPGI na ngonian dae na pinaandar ta pinalugaran an presenteng supplier.
Kung sagcod sa ngonian, dae ini nasabotan kan dating alcalde nin Bato, na decada nang nagtucaw sa municipio, daeng maginibo an mga consumidor.
*****
Dae pa ngani nakasumpa an mga naelegir na bagong opisyal nin mga municipio y provincial, nagpoon na palan an campanya para sa pagka-presidente kan Philippine Councilors League, na iyo an matucaw sa junta provincial kung siya an manggana sa pederasyon.
Segun sa mga chismoso sa politica, naka-ansyas na daa si PBM Bani na maggraduar na cotana sa Junio 30 alagad gusto mag-enrol otro sa panibag-ong kurso sa SP, he! he! he!
An soboot aviso kan saiyang adviser na si Cong Bong, magpoon na pangaroy nin votante caya daa an mga nangganang consejal sa Baras iyo na an inenot na hinaryaw.
An problema, igua man nin nag-interes sa Bato, si consejal Lito Alberto, na an amo an natadang duwang ingredients kan Bag-ong Timpla.
Adyan man daa an mga gusto man makisalpukan sa rueda na sinda consejal Toto Mendoza y Vir Candelaria kan Virac.
Kung hiligpitan an laban, sigurado kitang pakatapos sanang pagsumpa kan mga ganador, cadaclan kan mga ini gagakdan na kan saendang mga bossing sa cada municipio tanganing masiguro an kapangganahan kan mga ma-presidenteng consejal sa municipal chapter.
Hayahay na naman an mga consejal, makabawi-bawi nin diit kan saendang sinabwag sa pantominang daeng tugtog kan Mayo nueve, he! he! he!
*****
Herac man kang tinigbak na MSWDO kan Viga, ni daeng hona-hona na nag-overtake saiyang duwang nakamotor sa saiyang pagparibod sa Oceanview, iyo na palan an matapos kan saiyang buhay.
Sagcod sa ngonian, dae pang anuncio an mga pulis kung ano na lamang an saendang naginibo sa paghanap kung sisay an responsable sa krimen na ini.
Naheling na daw an gabos na CCTV sa inagihan kan biktima, na sinundan na siguro kan mga suspetsado magpoon pa kan Lunes?
Nakuahan na daw nin declarasyon an soboot mga nakadangog kan mga patakot sa buhay ni Carmel Eubra?
Sa ngonian, magayon na halat-halaton kan banwaan kung ano an resulta kan imbestigasyon bako sana kan pulis kundi kan NBI.
Sa pagheling kan cadaclan, pareho ining magiging maingat sa saendang mga hiwas, lalo na ta mainit an mata kan publico (pati na an mga macuapo ni Nestor) sa kasong ini.
Bagui man sana sindang gatulay sa gabagang alambreng nakatayod sa ibabaw ning subang dacul an buwaya