ANG MGA BITOON

kang saladay pa ang mga aki
saro kang samong mga bonding
ang magpauran sa mga bitoon
sa samong laguertang magabon

sarong maugay na kabanggihon
buhay na buhay ang kabitoonan
ta nagpahingaro man su bulan
nag banig kami sa kagabonan
dangan kaming lima nag urubayan

maugma saka trangkilo ang kabanggihon
mafresco ang hadoc ning amihan
mahamot ang mga burak sa hardin
pagkariniwanag ning kalangitan
(dai pa kaming koriente caidto)

naghapot su mga aki
-ngata ta igwang mga star?

apurado su simbag mi mag-agom
base sa mga osipon ning mga gurang
– iyan ang mga tawong nagadan na
na nag gibong karinasan sa kinaban
kaya maski aduman na sinda
padagos ang pagiging ilaw ninda

utro hapot

-ngata ta igwang saladay, igwang dalacura? -ang saladay, su mga nagadan caidto pa ginatos nang mga taon ang mga dalacura naman dai pa sana naawat kagadan kaya kung mag gibo kitang karinasan magiging ilaw kita sagcod pa man

padagos ang samong ilistoryahan
mga ginutos sa osipon ning mga gurang
kang namate kong dai nang liribok
sabi ni agom, ga karaturog na sinda

kaya saru-saro ming inaralsa
ang nanok ming mga ginaha
nganing mag-aga kaming mag urubayan
sa bag-o mi pa sanang harong –
ang samong palasyong payag sa valencia

Leave a Reply

This site uses Akismet to reduce spam. Learn how your comment data is processed.

%d bloggers like this: