Naringwan na si Hector?

Gurumod-gumod daa an mga contratista sa Isla Maogma matapos makaresibe nin mga tiket para sa inagurasyon asin pagbasbas kan katedral kan nacaaguing semana.
Segun sa tambay na dacula an taringa, si Cong Hec daa an dinuhuran kan mga tiket na an saro soboot gakahalaga ning dos cientos mil pesos, alagad nagsayuma daa ini.
Imbes na magbotbot sa saiyang hararom na bolsa, sinabi daa caini na italtag an mga tiket sa mga contratista ta sumu-sumo man daa sinda nin mga proyecto, he! he! he!
Kung nagtao an mga tinawan, dae ta isi. Helingon niyo na sana tabi an video kan seremonya y misa sa katedral tanganing maberepikar kung igua duman ning mga contratistang gasumu-sumo pa nin proyecto y igua pang mga mur-it na cuarta, he! he! he!


Nareparo daa kan mga votanteng nag-atendir kan misa na dae daa naunabi an pangaran ni Cong Hec sa homilia ni Cardinal Advincula, mantang aduman daa sa atubangan nakatukaw an congresista.
Mayad pa daa si alcalde Posoy, na dae daa duman, nabanggit sa mensahe kan cardinal.
Dae man daa naghikay an congresista, ta tinapos ngani an tolong oras na programa, bakong arog kan iba na mga magatol an bitis.
Kan Simba, hinanap daa ni Monsenyor Manolo si Cong Hec para maghagad nin dispensa. Wara daa sa mansion an politico alagad nasusod man daa ini sa sarong miting. Dae man daang problema qui Cong, he! he! he!


Ngonian, dae man siguro sinadya kan cardinal na maringwan si Manoy Hector ta bako man ining arog kan cadaclan na mga capitan na soboot pigringwan na siya.
Gabalos man sana siguro an mga capitan ta baging pigringwan sinda kan congresista magpoon kan pandemya y ngonian na man sana sige an tugpo sa isla ta harani na an eleksyon.
Tibaad kadinakol na man an trabaho ni Hector sa Congreso caya nakaringaw nang bisitahon an saiyang mga constituentes kan panahon.
Pati daa su premyong lote nin daga diyan sa SIV na pigdonar bilang premyo sa paripa sa katedral dae pa daa naitao, sabi kan ganador. Kung ngata dae caini pigasingil an comtiva de sabot sa raffle, dae ta masabotan.
Baad naringwan naman ni Cong Hec an papremyo sa kadinakulan kan mga dagang binakal niya sa Isla Maogma.


Naghuron na daa si Gob Boboy y Cong Hec manongod sa saendang candidatura sa eleksyon sa otro taon.
Kung ano an napagkaoyonan, dae pang anuncio an matab-ang na timpla.
Ngonian na semana, siguradong pupun-an na an pagplantsa kan saendang linyada magpoon sa itaas hanggan sa baba, tanganing handa na sa pagsumitir kan CoC sa Comelec sa enot na semana kan Oktubre.
Posibleng dae na an tamang timpla, ta dae na daa puedeng ihalo an azucar sa kape.
Kung kaya pa nin tawo mainom an maluwas na timplada, dae ta isi.
Puede man siguro na inumon na sana nin solo an gatas, dae nang kape tanganing bakong mahaldat sa tulak. Isabay na sana sa gatas an pan de sam, makabasog pa, he! he! he!


Onse na palan an mga kaso nin COVID-19 variant sa Isla Maogma.
An lima daa caini mga Alpha variant y an anom Beta variant, sabi kan DOH.
Sabi pa, an Beta daa an mas nakahawa kaya pinatanidan kan DOH an publico (dae na cabali si Nestor ta daeng COVID sa langit) na magsunod sa Minimum Public Health Standards.
Sagcod sa ngonian, dae pang anuncio an mga maorag alagad muyit na mga opisyal sa salud nin provincial manongod dindi.
Daculang problema ini kung maglakop an Beta variant y dagdagan pa nin Delta.
Dae mo man maobliga an mga tawo sa barangay na maggamit nin face mask asin face shield lalo na kung kulang na ngani an pambakal nin pagkaon asin load sa selpon.
Magayon caini, manaltag an local na gobyerno nin mga face mask na puedeng labhan pati face shield, sabay na sa istriktong pagbantay sa barangay.
Saro pa, kung dae kaya kan autoridad na ipublicar an mga pangaran kan iguang Alpha, Beta o Delta variant, cotana sabihon lamang kung anong barangay o saen na tinampo tanganing makarikay an mga tawo.
Maghiwas man kamo asin magpatanid!!!

Leave a Reply

This site uses Akismet to reduce spam. Learn how your comment data is processed.

%d bloggers like this: