Sayang an ginastos kan quarantine

𝘲𝘶𝘪 𝘛𝘢𝘯𝘨 𝘛𝘢𝘤𝘪𝘰

 

Winasawas ni Rolly an limang banwaan sa sur na parte kan Isla Maogma, na an cadaclan na residentes nangaturog sa paghona na duman sa norte matama an bagyo.

Iyo na ini an panahon sa ngonian, bako nang gabos na bagyo paitaas o pantay an buag. Igua nang parabuso, nanusod ning inagihan kan nainot na Quinta.

Murhi na kan magimata an gabos sa sobrang kusog kan hangin, tarakot na nagpatarago, binayaan na an mga nadistroso para sana makasalbar sa discuedo.

Mayad nganing mabilis an buag kan bagyo, ta kung arog qui Sening na ocho kilometros por ora an lakaw, daeng matadang kahoy na harong na gatindog.

Magpasalamat kita sa Dios na buruhay pa an cadaclan asin ipamibi ta an mga nagadan…
*****

Sa pagheling kan mga pilosopong tambay, mayad pa daang dae nanaltag nin pagcaon an mga local na gobyerno kan panahon nin quarantine, lalo na ta kulang pa man an kaso kan COVID-19 sa isla kan Marso hanggan Hulyo. Cotana dae ngona nag-imponer si Pay Digong kan nationwide na quarantine tanganing maisalbar an fondo.

Sayang an cuartang pinambakal nin bagas, sardinas, kape, azucar, noodles asin iba pa. Sayang an panahon na cotana nakatrabaho an cadaclan, lalo na an mga transport sector.

Kung isi ta sana na mangaipo kita nin perac para ipangtabang sa mga victima nin sunod-sunod na bagyo, an mga na-quarantine sana cotana an pinakaon nin masiram.

Sisay daw an mga dimalas na tawo sa gobyerno ngonian?

Harimbawang igua pang uminabot na supertyphoon ta duwang bulan pa an maagui, sae na makitkit an mga alcalde, gobernador, bocal, consejal asin pag-iriba oras na sinda hagadan nin tabang?
*****

Mahagad palan nin dispensa an caterer na nagpacaon nin nacaonong na sandwich duman sa nakilubong qui defunto Tang Ando Cua.

Haman na daa an open letter of apology alagad dae na nailuwas sa social media ta naputol na an servicio sa cellphone asin internet.

Sobrang sanggatos katawo, kaibahan an enterong familia, an dinara sa ospital dahil sa pag-obra. Mayad nganing nagtao nin tabang pinansyal an familia kan Cua, cotana dacul na kasong criminal an aatubangon kan caterer.

Kung pira man an itao kan caterer duman sa mga dae na naabtan nin tabang, dae pang noticia. Tibaad lamang maghengoha bago pa man abtan nin reklamo sa municipio o sa Korte.
*****

Mayad pa an mga taga-korte ta macarecibe ning durodaculang benepisyo sa maabot na Deciembre.
Inaprobaran na daa kan Korte Suprema an regalong maabot sa sarong bulan na sueldo pero dae mababa sa veinte mil pesos sa cada empleyado magpoon ordinaryong dyanitor janggan mga juez.

Ano man daw an marecibe kan mga empleyado sa municipio, provincia y mga oficina de gobyerno, lalo na itong mga daeng deligencia posibles sa mga proyecto?

*****

Tuyo palan na nagparibod si Cong Hector minsan igua nang gadangadang na bagyo kan Hueves.
Duman na ngani daa ini inabot ning kakusgan ni Rolly sa oficina ni gobernador.

Mayad na gibo ini, ta tibaad sa sobrang barik-barik ni TGP partylist Cong. Bong Teves, siya na an mabidbid na representante kan distrito nin Catanduanes.

Alagad, bako man sala ni Manoy Hec kung dae siya nakaparibod cada bulan. Goslab na man an satong congressman y bawal na ngani magparaluwas lalo na ta GCQ an Metro Manila.

Natural, habo man an saiyang mahal na agom y familia na siya maolakitan nin COVID por sobre sa saiyang trabaho, lalo na ta dacul na man an na-COVID sa Batasang Pambansa.

Sabuton ta na an trabaho nin congresista nasa Congreso y dae man puedeng siya manghagad nin fondo o magproponir nin ley sa paagi sana nin Zoom o telepono. Kaipuhan man guiraray an diit na hinghing, hapiyap y lahidlahid sa mga tawong kapot an kaban nin gobyerno.

Leave a Reply

This site uses Akismet to reduce spam. Learn how your comment data is processed.

%d bloggers like this: