qui Tang Tacio
An primerong batch nin evacuees haring Maynilang kayganda tapos na an catorce dias na quarantine sa harong, kung an mga ini nagsunod sa autoridad.
Kung iyo, graduar na sinda y puede na makihampang sa kaonan sa kanya-kanyang familia.
An dae pa tapos, iyo itong uminabot sakay nin bangkang de motor sa Calolbon pati na an mga nag-last trip sa ferry na cotana dae na pinalaog.
Diyan sa Virac, iguang solamenteng PUI na nakaestar sa ospital na privado. Nakaluwas na daa ini alagad igua naman nin gurang na soboot dinara sa pampublicong ospital.
Igua daa ini nin sintomas nin biros ni Pay Digong caya nagpa-admitir. An problema ta pag-abot sa cuarto, saka nagtuga na an naghatod saiyang soltero PUM palan, caya nagkagaramo an mga frontliners.
Kinaipuhan pa sindang ipaagui sa disinfection bago pinaluwas nin ospital.
An hapot, ngata ta sigeng balagbalag an PUM na ini kung nasa self-quarantine? An gustong sabihon caini inutil an mga opisyal sa barangay, lalo na an BHERT na iyo dapat an mabantay sa mga PUM y PUI na sinda magtener sa laog nin harong.
*****
Duman man sa natsismis na politicong na-confine sa ospital soboot ta iguang hika y helang sa puso, dae tabi magmuromuto an mga invuelto kung an isyung ini nag-trending sa social media.
Pasensya an mga politico ta sinda midbid nin tawo, lalo na kan mga tambay sa ospital.
Apat man sana an hapot kan mga marigmat an mata.
Kung an helang ordinaryo man sana, ngata daa ta aduman sa isolation room dinara an pasyente?
Ngata daa ta an mga personajes kan ospital na nag-atender saiya anas naka-PPE y mascara?
Ngata daa ta pacaluwas kan pasyente, kinaipuhan pang mag-disinfect sa enterong edificio kan isolation room?
Tama daw an pagdesignar nin isolation ward na iyo nakaseparar sa ospital alagad an aaguihan tinampong gamit nin publico (cabale an mga macuapo ni Nestor)?
*****
Dacul na an mga maboot asin matinuwang na mga tawong sige an tabang sa mga frontliners sa ospital y checkpoint.
Iguang mga ordinaryong tawo na narecognizar an daculang papel kan mga ini tanganing an comunidad dae maolakitan kan helang. Igua man nin mga epal na politico, nagtao man cotana alagad aduman nakadukot an pangaran ninda sa limos, he! he! he! Makunit na an mga panit caini, caya dae na gakapit an birus. Hilinga, ni sarong politicong nag-positive dae pang natigbak, alagad an mga doctor sampulo na, pwe!
Ngonian, sa kadinakulan kan mga dinuhor na pagcaon, an lamesa sa checkpoint minsan bagui nang tindahan o panaderia.
Saro sanang frontliner an baguing dae ta naguiromdoman na tabangan: an mga padi, na iyo man an minasirbeng tagahagad nin tabang sa Mahal na Dios.
Duwang semana nang daeng misa para sa publico (cabale pati nacaayon quila Nestor), entonces dae nang koleksyon. Herak man lalo na itong mga helako na sa painom-inom nin mompo. Masakit man daw magtao nin offering kung gamisa sa Facebook, mapasâ an screeen kan cellphone o TV, he! he! he!
An mga igua pa man nin sobra, magtagapadara man tabi sa kumbento…
*****
An hapot man sa mga barangay nin Virac, ngata daa ta bakong parareho. Iguang tolong kilo, an iba lima, an iba duwa iguang cabanga.
Masabotan man daa cotana kung pariwanagon nin barangay kung duwang kilo hari sa sainda y an dagdag hari man sa municipio, alagad dae man pigapasabot an natawan na familia.
Igua lugod nin duda kung tama an pagbaranga kan mga binakalan na bagas y sardinas na pigaatado sa mga manlaenlaen na municipio.
Sabi ngani nin sihongan na taga-Virac, magcapira daang mga consejal lalo na itong mga tahodan natawan daa nin tigduwang sako nin bagas hari sa relief ta masakit daang sayumahan. Itatao man daa sa saendang mga tawohan, na makadoble lugod nin tabang.
Iyo siguro ini an rason kung ngata bakong parareho an taltag, he! he! he!