qui Tang Tacio
Apat na congressman an nasa Virac kan nacaaguing semana.
An tolo uminabot sakay sa eroplano: si Cong Hector, si Cong Bong, y si ex-future Cong Manay C.
Si Manoy Hec y Cong Bong nanaltag nin bagas duman sa Baras mantang si Manay Cely nag-anuncio na igua naman siyang bitbit na tolong escuelahan na ipatogdoc kan Filipino-Chinese Chamber of Commerce and Industry.
An ikaapat nag-abot haleng norte, nakaabot sa motel y pakatapos nin pirang oras, pina-check-in sa carcel kan Virac police station, daeng bayad an higda, he! he! he!
*****
Magayon daang basahon an laog kan cellphone kan dating candidatong congressman,
Aduman daa an saiyang mga text message sa magcapirang inhenyero sa DPWH, an bangko nin mga congressman, he! he! he!
Gahanap na ngani daa si Major Timuat nin iba pang mga reclamador tanganing madagdagan pa an kaso qui ex-future congressman.
Alagad baguing harabo na man maglantad an mga ini ta tibaad daa madagdagan pa an mga parapakilimos sa saendang trangkahan, he! he! he!
Saro pa, tibaad daa harimbawang makaluwas an akusado sa maabot na panahon y ginatos na kaso sa Ombudsman an pambalos sa sainda, he! he! he!
Dae man daa cotanang problema kung maghagad nin panggasolina o pambakal nin pagkaon basta bako man oro-aldaw o pirilitan.
An masakit daa ta pati an pambayad sa babaye y motel, ipinangilimos pa, he! he! he!
*****
Inaapodan an publico (caiba an mga eredero ni Nestor) na maghorop-horop ngona bago seryosohon an soboot pag-recruit nin mga miembro nin bag-ong Federal Police.
Segun sa mga nacaisi, nagpoon daa an training sa sarong bukid duman sa Viga kan Deciembre 2019 sa pangengenotan kan soboot OIC-deputy premier kan Federal Autonomous Republic, si Jacinto Obre. Dati na daa ining nagcandidato kan 2010 y 2013 para alcalde nin Viga, alagad nakakua sana nin veinte ocho y cuarenta y ocho votos.
Sa enot daang paapod, cincuenta katawo, caibahan an mga menor de edad, an nag-aparecer duman sa bukid sa Begonia, alagad ini buminaba sa treinta y ocho matapos na haleon an mga joven pa pati an ibang dae qualificado para maging Federal Barangay Police.
Iyo na daa ini an masalida sa PNP y babayadan sinda nin cuarenta mil peros an bulan oras na makatukaw na an revolutionary government.
Kabali daa sa nasabing grupong nag-organizer kan pa-training an magcapirang ciudadano na suportado an federal revolutionary government. Igua daang abogado, dating consejal y ministro sa sarong relihiyon.
Dae man daang problema kung mag-training an mga ini para sa saendang soboot maabot na trabaho bilang federal police alagad iba nang horonhoron kung madara na sinda nin armas.
Bahala na an mga recruit kung pag-abot kan oras, daeng mangyari sa saendang mga pangaturogan…
*****
Baguing maenot pang pag-abot sa isla an virus kan African Swine Fever (ASF) kaysa corona virus.
Segun sa osipon, adyan na sa Camarines Sur an helang na ini nin mga orig y ginatos na ngani daa an tinigbak na mga orig. Nag-lockdown na man an CamSur y Albay laban sa mga malaog na buhay na orig y produktong gibo sa carneng orig arog kan longganisa y tocino.
Magayon na ngonian pa sana, abisuhan na an mga barangay na iguang baybayon na bantayan asin ireport sa awtoridad an mga gaabot na bangkang demotor na may darang buhay na orig.
Dati na daang alerto an mga ROROng haleng Tabaco manongod sa ASF y dae na yata pinapasakay an mga imported na orig.
Mas masakit kung maabot an ASF sa isla, ubos an mga kaorigan dindi. Mapilitan an mga tawo na kaonon an mga maldos na pambulang, haronon an gulay y magbakal nin pagkaminahal na sila sa saod.
Maniwang an mga mahilig sa pork chop, barbecue, sisig, humba, dinuguan na tulak, katoy, pata asin iba pang masiram na pulutan. Lugi man an mga restawran y turo-turo…