Nag-abot palan sa Isla Maogma an nagpundar kan pinakadaculang companya na gagibo nin asin sa enterong Pilipinas.
Binisita daa caini asin an saiyang mga technician an mga posibleng puedeng kanghan nin asinan sa magcapirang banwaan.
Cabale dindi an mga paragibo nin asin duman sa Bote sa inotan kan Batalay House of Representatives.
Awat na palan ining tigbak dahil sa kakulangan nin suporta sa gobyerno alagad binuhay ni Manay Siliwong bilang preparasyon sa ASINsadong project kan bag-ong administrasyon.
Caya ngani kung marigmat an mata nin parasunod sa social media, an mga litrato kan lugar gapaheling na an mga trapal na ginamit sa proyecto anas pa bag-o, he! he! he!
Kung apat na municipio – Caramoran, Bato, Gigmoto y Pandan – an tatawan nin fondo ni Gob Pata, tigsarong milyon an mga cooperativa na imukna para magpadagalan kan proyecto.
Posibleng an cuartang ini gagamiton sa pagbakal nin mga kagamitan pati na sa operasyon kan asinan.
Kung ano an mga ini, tibaad an Salinas Foods, Inc. na an masuplay, lalo na ta sinda an nacaisi kung ano an caipuhan.
An hapot ngonian, kung anong paagui an gagamiton sa paggibo nin asin.
Segun sa pag-aadal, bako daang marinas an salt production sa mga lugar arog kan Isla Maogma na daeng ciertong panahon nin tag-uran y an limitado sana sa mga mainit na bulan magpoon sa Abril sagcod Agosto an paggibo nin asin.
Ini lalo na kung an gagamiton seawater evaporation o ang pag-barad nin tubig dagat sa aldaw.
Puede daa ining gibohon sa paglaga kan tubig, alagad mangaipo naman nin pandus-og na kahoy o ata kung igua.
Bahala na caini an gobyerno provincial kung papanohon an proyecto…
*****
Segun sa mga osipon, bako daang pareho an nagluwas na lista nin mga alokasyon sa Supplemental Budget No. 1 na inaprobaran buda an enot na isinumitir sa junta provincial.
Nareparo daa ini kan mga taga-Provincial Budget Office ta iguang nawara na dating fondo kan Sangguniang Panlalawigan.
Kung ano pa an mga napinaw na mga proyecto o programa, maisihan ta kung iluwas an inaprobaran na budget.
Igua sigurong nagmilagrong kapre, duwende o iba pang tawo sa lipod diyan sa satong Sangguniang Panlalawigan.
*****
Dae daang mga abogado an anom na mga temporary PBM na isinalida sa mga suspendidong bocal na miembro nin Lakas.
Dae man daa puede sindang tawan nin abogado ni gobernador hari sa Capitolyo ta magkaiba man sindang oficina.
Caya kanya-kanya sindang disponer nin imo para pambayad sa acceptance fee kan mga abogadong ini na maabot sa rinibong cuarta.
Bako na ining hayo-hayo, minsan nacalibre daa an mga in isa tiket sa eroplano pati estar sa hotel kan sinda magsumpa sa DILG dae pa sana naawat.
Alagad igua man nin under-the-table o paipit na dae nahiling nin publico, he! he! he!
*****
Marinas na maisihan nin publico (bako sana ni Noynoy) kung ano an isimbag kan anom na bag-ong bocal lalo na kung noarin sinda naging miembro nin Partido Lakas-CMD.
Natural, nag-aradal na man an mga ini kan saendang mga sasabihon sa Corte oras na hapoton kan mga abogado o can juez, Igua na man ini nin mga codigo, he! he! he!
*****
Sabi man ngani nin sarong abogado de campanilla, mas delicado an camogtacan ni PBM Joy Tamayo, na iyo daa an nagsalida qui PBM Sonny Francisco.
An problema, nagadan an bocal kan June 5 soboot sa kamomolestiya sa suspension, bago pa man magsumpa si PBM Tamayo.
Guiromdomon na an anom, cabale si Tamayo, mga katukal kan mga suspendidong PBM.
Entonces, ta nagadan si PBM Sonny June 5 y an pagsalida saiya ni Titser Joy pacaagui nin onceng aldaw, sala na an procesong ginamit y illegal na an pagtocaw ni ma’am bilang PBM magpoon pa kang ini magsumpa.
An pigahoronan dindi bako nang temporary vacancy kundi permanent vacancy na iba man an proseso y naturalesa.
Kung an bagay na ini totocaron kan Corte o caya igua naman nin reclamong ipaabot sa DILG o sa paagui nin quo warranto, halaton ta sana.