Cincuenta pesos na palan an bayad kan cada vehiculo o carruaje na makiparada diyan sa laog kan aeropuerto nin Virac kung mahatod o matagpo nin pasahero.
Gabos daa dapat magbayad, afuera sana sa mga ginagalangan na honorable, lalo na an kahuruhalangkawi na soboot an darang carruaje sana an puedeng magparada sa parking area sa atubangan kan edificio kung malarga ini.
Sabot ta man ini, lalo na sa lado nin kahuruhalangkawi, ta dapat na macierto an seguridad kaini.
Dati veinte tres pesos an bayad kan cada sasakyan, sobrang doble an paglangkaw. Dae lamang hinapot kan CAAP an mga constituentes kung bako man ining magabat para sa saenda.
Sa ngonian, dae man nin dinagdag na servicio an collector y an mga guardia civil na pirming bitbit an togod na iguang salming para mahiling an irarom kan sasakyan kung iguang bomba.
Magayon cotana na reparohon man ini kan satong mga elegidong opisyal.
Kung dae man malarga an kahuruhalangkawi, palaogon man an mga carruaje nin ordinaryong pasahero diyan sa parking area sa tampad kan terminal building.
Icaduwa, dagdagan nin gibohon an mga guardia civil, bako sanang paagihan nin espijo an irarom nin awto.
Dapat na makihoron si manedyer sa TESDA na papag-adalon an mga ini nin basic vehicle maintenance duman sa Cabugao tanganing pakatapos nin inspeksyon kan irarom nin awto, puede na nindang abisohan an drayber kung igua nang toho an kaha kan awto, tugak na an mga tornilyo o caya salidahan na an muelle.
Puede pa sindang magdagdag nin ganancia sa pagtaltag nin calling card nin Rapide, Abuab Auto Supply, Virac Oriental Auto Supply asin iba pang parahingayad nin vehiculo o parapabakal nin piyesang Made in China, he! he! he!
Kung karag-karag na ang naglaog na carruaje, puede nindang sabihan an gamanejo na darahon na ini sa pinakaharaning junkshop para tusangon y mapakinabangan pa, he! he! he! Pareho kan mga Cong-tractor, igua sindang komisyon sa cada awtong paparadpadon, he! he! he!
*****
Taon dos mil veinte tres nagluwas an fondo para sa MICES gym ni Ako Bicol diputado Zaldy Co, naisihan ninda Presidente Azanza y Cong Yoloyo caya nagcaoyon na diyan ikahang sa CatSU.
Alagad nalainan an congresista sa paluwas kan pinakahangkaw na opisyal kan Cesar State University na siya an naghagad kan fondo qui Zaldy caya an ginibo man ni Yoloyo pinaapod an contratista y mga ingeniero kan DPWH regional office.
Binag-o an lokasyon kan facilidad hari diyan sa tahaw kan CatSU y dinara duman sad aga sa tampad kan St. John.
An dating gobernador man, kan maisihan na iguang problema an lugar kan gymnasium, nakataning sa tocawan an hadi kan Ako Bicol duman sa Bicol Hot Air Balloon Festival.
Sinabi niya qui Zaldy na duman na sana ibogtak an itogdok na edificio sa daga kan capitolyo sa rikod nin Zamboanga Farm. Dae man nangyari ta nakapoon na sa CatSU an contratista kan DPWH. Caya kinanghan na man nin fondong P100 million an para sa capitolyo.
Ta dae na nakua an naglamyerdang congresista kan partylist na mahilig sa insertion o pagduldog, posibleng dae na madagdagan pa an para sa gym nin capitolyo y hanggan pundasyon na sana ini.
Ini man na nasa Calatagan Tibang, caipuhan nang kulkugon kan satong mga lideres an DPWH y an contractor sa bagolbolon nindang trabaho sa P350 milyones na proyecto. Taon dos mil veinte cuatro nagpoon, hanggan ngonian gatirindog pa sana an poste, naabayan pa kan patrabaho sa VTC annex building na maatop na lamang, pwe!
Sukat nang advance an komisyon kan mga nanunungdan, caya kinapos an contratista sa capital….