Nagpahayag na an duwang daculang simbahan sa mga paratubod sa Isla Maogma.
Bago pa man nag-abot an nacaaguing Simba, pinaapod na daa kan lokal na INC an mga candidatong saendang susuportaran sa maabot na eleksyon.
Ini itong mga gadalagan magpoon bise gobernadora pababa sa consejal.
Segun sa mga chismosong Catolico, an mga naheling daa duman sa simbahan sa SIV iyo sinda PBM Obet, Gob Boboy asin magcapirang PBM y consejal.
Dae daa sigurado kung an gabos na nainvitaran aduman, lalo na kung igua na man nin iskedyul na house-to-house an grupo.
An cierto daa, bako si Cong Yoloyo o caya an hilaw pang bocal an sinuportaran kan INC Central para sa congressman.
Sa pagkagobernador, bako man daa an daeng buhok, puti ang buhok o an pinakahababang candidato an napusuan kan liderato sa Templo Central.
Entonces, an paralakaw na si Samuel y an galanteng si Boss Te an nabasbasan kan mga ministro.
Maray na bareta ini sa mga napiling candidato ta sigurado na an voto kan rinibong parasunod ni Ka Eduardo Manalo sa Mayo dose. Dae pa naman ini nabakal, masqui pa dos mil an itao ni Yoloyo, he! he! he!
*****
Nagpaluwas na man nin surat pastoral an simbahan na Catolico sa paagui ni Monsenyor Luisito Occiano.
An tugon kan mahal na obispo sa mga parasimba iyo na hilingon an karakter asin mga katuyuhan kan lambang kandidato tanganing maseguro na an satong mga pagpili makakatabang sa gabos, bako sanang sa nagkapira.
Pinaguiromdom sa mensahe na an pagpabakal asin pagbakal nin voto sarong dakulang pagkakasala sa Diyos asin kontra sa kasabihan sa Bibliya na an gabos dapat mag-adal maggibo nin tama.
An surat binasa sa gabos na misa na ginibo sa cincuentang mga parokia kan Domingo.
*****
Alagad, baguing murhi na an pangapodan sa mga candidato, ta an cadaclan nanaltag na nin sabon, shampoo, kape, baldeng iguang manlaenlaen na bagay, bolong, bitamina, pancit, noodles, manincuenta y mananggatos hari sa mga gacandidatong mga bocal y consejal, pati na sa bise mayor y mayor.
Nagribot na man daa an mga carruaje ni Cong Yoloyo, sakay an mga Santa Claus pati mga duwendeng iguang armas para manaltag nin dos mil cien sa Virac, mil seis sa Calolbon y Caramoran, asin sanribo sa saraday na banwaan.
Parte na siguro in ikan nawarang ganancia y sueldo kan mga local na contratista y trabahador na iyo an nadanyosan kan duman ipabidding sa DPWH regional office an binilyon na mga proyecto kan Isla Maogma.
Magayon na akoon sana an grasya nin demonyo, lalo na kung an pamayad na ini makatabang sa pagbakal nin mga caipuhan kan familia.
Saindo man sanang cuarta ini, ta hinabasan sa publico (kabali an mga nahubon ni Nestor) sa nacaauing tolong taon.
*****
Sabi ngani kan saro sa mga naderota ni Gob Boboy sa mga nacaaguing eleksyon, “vote wisely!”
An gustong sabihon, maging madunong kita sa pagvoto sa Mayo dose, minsan makasala kita sa pag-ako nin cuarta o ano pa man na bagay.
An importante, pillion ta an tamang candidato na hababa an sungay y iguang daculang tsansang manggana, minsan hababa pa sa dos mil an panaltag.
Dae na pagpilion an nakaestar sa mansion sa Maynilang kayganda na an mga muebles pati an mga kubyertos y mga plato gold-plated.
Sa siring na paagui, dae na kamo mapilitan na mangahang sa Batalay District Jail para pahalaton nin pilang oras sa luwas kan Great Wall of Batalay.
Duman na kita sa ganador sa serbisyo publico, madaring lanihan y mabilis magtuwang…
*****
Sunod-sunod an mga suicide na nangyari kan nacaaguing semana.
Pinun-an sana nin dating kapitana sa Virac na dae nakayanan an dakul na problema sa famila y sinundan nin joven pang lalaki sa Bato na nagkulog an boot ta dae daa dinarhan nin pamahawan sa cuarto.
Naghabol pa daa an saro pang joven na lalaki sa Gogon pati an security guard ning agencia de gobyerno na sinayang pa an bala kan badil na pagsadiri kan amo.
Ano na ini, patunay na sagcod ngonian dae natatawan nin gobyerno nin magcacanigong atensyon an mental health kan constituentes?
O maluya na an pagpadacula nin mga aqui ngonian na anas nang mga maroromhon, dagos minadapa sa atubang nin manlaenlaen na problema, lalo na an dara nin social media?
Magayon na repasohon an mga programa y palisiya kan gobyerno. Iyo, igua nin hotline an magcapirang agencia o RHU para sa mga iguang problema sa buhay, alagad an hapot kung ini aktibong minahagad nin cooperasyon kan miembros nin familia, amigo y amiga kan mga naheling na iguang kamatean sa emosyon asin pag-isip.
Helingon man kung an mga victima aktibo sa saendang simbahan o caya macusog an pagtubod sa Diyos, na an pagkamoot sa lambang tawo dae masusukol.
*****
Magpoon pa kan Viernes, dacul kang maheling na gaoromonomon sa tinampo, lalo na sa hararayong barangay.
Ini bakong senyal na sinda galahat qui Santa Claus, kundi gahoronhoron kung ano an saendang nakua o dae nakua sa mga candidato, he! he! he!
Dae na man siguro dadakupon kan COMELEC y ibang autoridad an mga tinaltag na mga gamit personal y pangkusina o labada.
Kung mandadakop man sinda nin mga macuartang Santa Claus, baguing medyo masakit lalo na ta an mga ini nakasakay sa mga carruajeng gibo nin Toyota, Nissan, Chevrolet, Ford y Mitsubishi.
Siguradong bako sanang Santa Claus y mga regalo an sakay kundi pati mga alipores na posibleng iguang armas na hari pa sa Mindanao.
Ipamibi na sana kan banwaan na maging matoninong an mga masunod na aldaw bago mag-eleksyon.
Kumbaga, daeng mangyaring encuentro sa mga parataltag y an autoridad.
Ini satong hagadon tanganing pag-abot nin Martes na aga, puede tang ibalangibog na nagcaigua kita nin peaceful vote buying, pwe!