Sa enot na aldaw kan campanya sa local na eleksyon, nakisabay an mga taga-COMELEC Catanduanes kaiba ang pulis y mga caminero sa DPWH sa Grand Operation Baklas kontra sa mga illegal na karatula kan mga candidato.
Igua man talagang tinarangkas na mga karatula sa Virac, lalo na itong nasa gilid ning highway, alagad igua pang nagkatarada.
Ini itong mga dae na nareparo, lalo na itong daculang tarpaulin ni Senador Imee sa ibabaw kan oficina nin traffic police sa piyer asin an mga karatula ni dating DILG Secretary Abalos diyan sa uma na sadiri kan CatSU.
Diyan man sa Concepcion, iguang mga gatirindog na tarpaulin nin capitan sa gilid nin tinampo, na cotana bawal segun sa ley y bako sanang bawal kundi makaorang sa galakaw.
Maguiromdoman na nagparada man an candidatong ini sa población kasabay nin ginatos na traysikel, y sabi kan naoring consejal, daog pa daa kaini an kinoronahan na Mutya ning Virac, he! he! he!
Pasensya kamo ta dae kamong ganancia hari sa ukay-ukay y gulay, he! he! he!
*****
Inaapodan man an CatSU Board of Regents na singilon na nin arkila sa espasyo an campaign headquarters ni Benhur Abalos sa pagbogtak caini nin mga posters sa uma diyan sa kanto nin Moonwalk.
Siring man, panahon nang tawan ning statement of account an dating presidente sa padagos na paggamit caini kan uniporme nin CatSU sa panahon nin campanya political.
Tawan nin trabaho an mga IT sa escuelahan na repasohon an mga Facebook posts kan mahilig sa pata tanganing mabilang kung pirang vez ginamit an logo kan CatSU sa campanya.
Kung habo an BOR na gibohon ini dahel sa daculang utang na boot sa mga naginibohan kuno kan dating amo, magayon na magpamiting na sinda sa madaring panahon y ideclarar an saday na hamon bilang opisyal na candidato kan CatSU, he! he! he!
*****
Igua na naman nin garuluwas na mga survey na bakong rehistrado sa COMELEC.
Kwidaw kamo sa resulta kan mga ini ta posibleng dinara sa masahista o parahilot an mga numero kan mga candidato.
Dae ta man mahihiling an tunay na resulta caya dae kita sigurado kung ini totoo, bobowa o halong bobowa asin totoo.
Posibleng hababa an nakuang numero ni Pulano alagad dinagdagan tanganing mabawasan an lamang kan nangenotan.
Posible man na binawasan an mga numero kan mga nakalamang sa consejo o junta provincial y dadagdagan an maluya tanganing magluwas na gaasenso man sa pagheling nin mga votante.
Alagad, an sigurado an cadaclan, iitaas an kamot ni Bos Te sa Mayo trese, kasabay kan mayoriya kan candidatong bocal sa grupo ni Cua.
Dae pa makacierto si dating bise gobernador nin mga toga laban ki PBM Obet na daeng dukit, lalo na ta gapoon na campanya, sabi kan mga kaalyado.
Cadaclan man na alcalde nin capitolyo makaluwas, afuera na sana sa Virac, Calolbon, Pandan y Bagamanoc, ta dae pa naheling an tambod y pusta kan mga manok, he! he! he!
*****
Binasura palan kan COMELEC an disqualification petition ni dating alcalde Posoy laban qui Gob Boboy Cua.
Dae daa nag-attach an veteranong abogado nin kopya kan COC ni gobernador sa isinumitir na petisyon, base sa Section 4 kan Resolution No. 11046.
Sa desisyon na pinaluwas kan nacaaguing semana, hinuritan kan COMELEC Third Division an tahodan na abogado na an probisyon kan COMELEC Resolution 11046 naggamit kan “shall” na an gustong sabihon pigaorderan an reclamador na sunodon an reglamento sa pag-file kan disqualification petition/
Ta bako man na bontol an dating alcalde y an abogado caini pag-abot sa mga kaso, saro na sana an rason kung ngata arog caini an nangyari: intension kan campo ni Posoy na hunaton an isyu hanggan makaabot sa taraltagan, ay sala, borotohan sa Mayo dose, he! he! he!
Siring man siguro an mangyayari sa petisyon kan dating halangkaw na opisyal kan CatSU laban qui Bos Te ta saro man sana an abogadong ginamit ninda.
Sa mga votante, bako nang mahalaga an desisyon kan COMELEC sa duwang kasong ini ta enot na nindang binotohan an magtugang na magin lider kan Isla Maogma…