Grabe ang reclamo nin mga residents nin Gogon y San Isidro Village sa soboot dae na resolveran na harab-onan sa saendang mga batrangay.
Nagpoon an paglaog kan mga suspetsado sa mga harong pati kataraning pirang bulan na an nacaagui.
Maabot an mga ini mga alas dos o alas tres nin maaaga, kung gahuragok na an mga kagharong pati na an saendang mga gadya.
An iba ngani daa, lalo na itong bako man na bakal an mga proteksyon sa bintana, bako sanang sarong vez kundi duwa o tolo pa nabiktima kan mahab-on.
Mga madunong na man an mga ini, bihira na magtabag nin mga gadget arog kan selpon o laptop ta madari masusod lalo na kung madiskubre kan pinabakalan.
An saendang pigadara kung bakong cash, mga bagay na mapakinabangan kan saendang familia o mga amigo.
Igua ngani daang insidente na pagkaaga matapos na laogon an harong, an dae nakaising kagsadiri sinitar an kairiba kung ngata matubis na an peanut butter sa kusina. Pinalaman na palan kan dae namidbid na visitang dae imbitado, he! he! he!
Magayon siguro riboton na kan mga imbestigador kan presenting jefe kan cuerpo da policia, si Maj. Emsol Icawat, an mga nabiktimang mga residents tanganing madakop na y makasuhan an mga suspetsadong halaba an kamot.
Igua daa diyan nin mga nabiktimang harong na iguang CCTV kan mga daeng kalag na ini, puede na ining gamiton tanganing masusod kung sisay y saen an mga ini hari.
*****
Naglangkaw na nin veinte pesos cada kilo an presyo nin carneng orig sa saod y sa mga lisensyadong parabuno sa luwas nin saod.
Masakit na daang magbakal nin buhay na orig sa luwas nin Virac, lalo na sa Caramoran, Pandan y Bagamanoc dahil sa prohibido na kan ASF Task Force kan mga nasabing municipio.
Sa ngonian, saro man sanang ogbon an kumpirmadong positive sa ASF y piglubong na ngani ini. Piga-obserbahan pa an ibang kataraning na hayop kung maolakitan.
Mayad nganing nagkatarapos na an halos gabos na piyestahan sa mga banwa y barangay.
An mga dae pa nagselebrar iyo an Payo (Hulyo 25), Pandan (Hulyo 31), Baras (Agosto 11), San Andres (Noviembre 30) y Virac (Deciembre 8).
Dapat mag-implementar nan in lakdang an mga gaataman nin orig na an saendang mga hayop dae maolakitan nin helang. Ta kung maghelang an mga bunoon, tapos an handa sa piyesta, mapasensiya an mga bisita sa binunong manok y langka pati adobadong angogan ta buro-barato, he! he! he!
*****
Dakul an mga visita ngonian sa Diocesis nin Virac sa pormal na pagtukaw kan bag-ong obispo, si Most Rev. Luisito Occiano.
Parano na daa an mga hotel y iba pang dagusan sa municipio, an iba ngani libre daa an pagpa-estar sa mga visita na maatender kan banal na Misa ngonian na Miercoles sa catedral.
Bilang mga maogmang ciudadano kan isla, pigahagad sa gabos, lalo na sa mga Catolico, na tagboon ta nin pagkamoot si Monsenyor Occiano y an mga makiselebrar sa aldaw na ini.
Ta cincuenta y dos anyos pa man sana si Bishop Louie, makaibahan ta ini sa pagpatalubo nin pagtubod qui Cristo sa laog nin veinte tres na taon bago ini magretiro sa 2047.
Mabuhay an bag-ong obispo!
*****
Mayoriya palan kan mga barangay, pati na itong an capitan del baryo kaparientes pa kan primerong congresista kan Isla Maogma, dae na pigaimbitaran an politico sa mga funcion, piyesta man, surumpaan o pabayle.
Segun sa mga nakaribot sa higadon, an paborito daang huespe de hono iyo an alcalde nin Virac na si Samuel Laynes.
Caya daa an gibo na sana kan primerong congresista, magsalisi sa mga funcion na ini, minsan dae siya imbitado, he! he! he!
Dae man daa namroblema an politico, na segun sa saiyang mga parasunod iguang supisyenteng cuarta na ipanaltag sa mga votantes pag-abot nin eleksyon.
Abisuhan man cotana an campo ni Cong Yoloyo na magpa-nobena na sa Batalay House of Representatives magpoon sa Oktubre nueve asin ipamibi na an saendang iduhor sa mga votantes, dae sana pagbulsahon kundi balosan nin pagsurant sa balota kan saiyang ngaran.
Natural, buy one, take one an laban, imbes na saro an matukaw na congresista otro, igua pang matindog sa kataning, he! he! he!
Padagos an pa-bidding sa ibong kan mga proyekto sa DPWH, padagos man an pagtios kan mga trabahador sa Isla Maogma, he! he! he! pwe!
*****
Nagbutas na daa nin pananaramon si bise alcalde Arlynn Arcilla na siya macandidato bilang alcalde sa Virac sa masunod na eleksyon.
Ini daa mangyayari minsan pa an saiyang kalaban iyo an mga tahodan na sinda dating alcalde Posoy Sarmiento y Gob Boboy Cua.
Kan 2022, an nakuang voto ni bise uminabot sa 25,559, mas halangkaw pa sa 22,757 ni alcalde Samuel y 20,431 ni ex-mayor Posoy.
Ta iba man an laban sa alcalde, na caipuhan nin mas halangkaw na taltag, mabag-o siyempre an lebel nin voto.
Base sa statistics, mas dakul an babaye sa mga lalaking votante kabali na an mga mayota, caya iguang pag-asa na makatsamba lalo na kung igua man nin pangmascada, he! he! he!