Pangduwa na ining vez na nagvisita an mga ambassador nin iba-ibang nasyon sa Isla Maogma.
Nangyari yata an primero kan panahon nin mga Verceles y dae man nin osipon kung iguang capitalistang dayuhan na nagsugal kan saendang cuarta sa Catanduanes.
Segun sa mga osipon, an familiarization tour na ginibo kan DFA y gobyerno provincial nagdara nin veinteng ambassador, sarong deputy head of mission o opisyal na masunod sa ambassador, y sarong charge d’affairs o tawong pigadara kung dae puede an ambassador.
An taga-Bangladesh binitbit an agom pati an duwang aqui, an taga-China iguang kaibang assistant y sampulo man an iguang ikit-ikit na agom.
Sa sampulong taga-DFA, saro sana an agom nin opisyal.
Uminabot daa sa cinco milyones pesos an gastos sa pagkaon y pag-estar sa hotel. Dae pa dindi kabali an gastos man kan Baras LGU sa pagpakaon sa East Coast Beach Resort y an pamirindal sa Tampad Beach sa Virac,
Igua man sigurong bayad an pagpanamit nin latik ni Impling.
Idagdag pa su gastos nin pulis sa krudo, overtime kan mga naka-duty na mga bantay, pati na an mga personajes kan mga municipiong binisita, amot an ginastos ni Juan de la Cruz sa tour nin mga foreigner.
Helingon ta sa masunod na santaon kung iguang mag-abot na capitalista hari sa saendang lugar o caya masqui turista man lamang, siring sa pahayag kan ambassador nin China na mainvitar siya sa saiyang kahimanwa na magpunta sa Isla Maogma.
*****
Iguang punto an bise gobernador sa pagsayuma caini sa pag-orolay na pinublicar na ni PBM Albaniel minsan dae pa nagsimbag an pinadarhan nin imbitasyon.
Segun qui Bise Obet, cotana kinahang na sa surat kung ano an paghoronan, ta ini dapat daang pagdiscutiron ngona kan SP bago pa man mangyari an orolay sa oficina ni gobernador.
Sabi ngani ni PBM Vergara, masyadong limitado an oras na tinao y daeng napagkaoyonan an mga bocal bago pa ini linuwas sa social media.
An dapat daa an paghonoronan iyo an 2026 budget sana pati na an pagtonong kan gobernador sa pagpaluwas nin mga comentaryong nakaraot sa mga bocal.
Magayon siguro, kung mangyari man, sa sarong lugar na pribado gibohon an harampangan y an paghingibit kan budget ngonian na taon.
Dae man puede an suhestiyon ni PBM Tanael na diyan sa atubangan nin Capitolyo, sa ibaba kan flagpole, magmiriting, ta an pinakaimportanteng paghoronan iyo itong dae nakalista sa agenda, entonses dae dapat maisihan nin iba, he! he! he!
Kung magkaoroyon sa barangaan, siguradong pasado an budget ora mismo, he! he! he!
*****
Totoo palan daang binakal nin Capitolyo an puting pickup truck na nakabangga sa Calolbon kan nacaaguing semana.
Apat palan an sakay kan vehiculo na pigmanejo nin soldados ning Philippine Army na soboot nangaturog.
Habo daa itao sa kagawad nin barangay an mga pangaran caini y an pulis pina-delete an video na kinua kan tanod.
Nagluwas sa committee hearing na pinaapod kan SP na an sasakyan binakal kan sarong taon pa pero panahon na kan presenteng administrasyon.
An supplier daa bakong qualificado magpabakal nin sasakyan na apat ang rueda, alagad inaprobaran kan BAC y TWG an award.
Sagcod sa ngonian, minsan bayad na an pickup, dae pa daa na-transfer an papeles caini sa provincia.
Alagad tinao na an carruaje sa Army kan General Services Office na dae pa nin inaprobaran na authority an SP sa provincia sa pagdonar caini sa Army.
Masakit an nangyayaring ini sa Capitolyo, baad makasuhan y mapreso an mga invuelto….